Павелічэнне колькасці зубраў запаволілася, а ў некаторыя гады ўвогуле прыпынілася.
Страты жывёлаў ледзьве пакрываюцца за кошт новых народжаных зубранят. Вынікі чарговага ўліку колькасці зубраў у нацыянальным парку "Прыпяцкі" будуць падведзеныя ў лютым.
Выявіць сапраўдныя прычыны такой з’явы перашкаджае шэраг абставін. Шмат гадоў запар у нацыянальным парку адсутнічае навуковы супрацоўнік, спецыяліст заолаг, які займаўся б вывучэннем прыпяцкай мікрапапуляцыі зубра пастаянна, назіраў за яе станам. У выніку, у некаторыя гады не было нават сапраўдных звестак пра агульную колькасць зуброў у "Прыпяцкім". Агульны стан зубровых статкаў быў ацэнены толькі прыблізна.
У асобныя гады па розных прычынах страты зубровага статку дасягаюць 7-11 жывёлаў. Агульныя страты жывёлаў за 20-ці гадовы перыяд назіранняў складалі больш за 50% ад колькасці народжаных. Зубры гінуць на дарогах, атручваюцца на палях, іх забіваюць браканьеры, а таксама паляўнічыя выпадкова падчас палявання.
У сакавіку мінулага году зубр загінуў у калодзежы на тэрыторыі меліярацыйнай сістэмы.
Паводле статыстыкі, у сярэднім штогадова нацыянальны парк атрымоўвае дазвол на здабычу, так званае селекцыйнае паляванне, адной жывёлы. Аднак у асобныя гады колькасць такім чынам выбракаваных зубраў дасягала нават сямі.
Зубр не з’яўляецца паляўнічым відам. Таму паляванне на яго афіцыйна носіць селекцыйны характар: забіваюць "забракаваную" жывёлу.
"Чорную метку" зубру выдае адмысловая камісія. Яе склад зацвярджаецца загадам дырэктара нацыянальнага парка. Члены камісіі - гэта прадстаўнікі самаго парка, Мінпрыроды, НПА "НПЦ НАН Беларусі па біярэсурсах".
Апошняе даследаванне прыпяцкай папуляцыі зубраў супрацоўнікамі НПА "НПЦ НАН Беларусі па біярэсурсах" адбывалася ў 2012 годзе падчас выканання імі адмысловага навукова-даследчага праекту.
Навукоўцы канстатуюць, што ў сучасных умовах існавання стан зубровага статку шмат у чым залежыць ад біятэхнічных мерапрыемстваў, патрабуе пастаяннага назірання.