Цэнтр любога горада — заўжды яго візітоўная картка. Па тым, як дагледжаны фасады дамоў, тратуары і вуліцы судзяць пра нас судзяць не толькі турысты. Чысціня ў горадзе неабходна ў першую чаргу гомельцам – гэта падмурак камфортнасці жыцця і знаходжання ў горадзе.
На вялікі жаль, у апошнія гады сумёты, што заставаліся пасля снегаачышчальнай тэхнікі стаялі пераважна да вясны, пакуль не пераўтвараліся ў ваду.
Падобная сітуацыя назіраецца і ў гэтым годзе, прычым нават у цэнтры горада. Пасля завірух, што завіталі ў горад у лютым, непрыбраныя сумёты можна ўбачыць нават на прыпынках гарадскога транспарта. Некаторыя з іх сягаюць ледзь не ў чалавечы рост і ўскладняюць працэс пасадкі і высадкі гараджан.
Часцей за ўсё такія кучы складаюцца са снегу, бруду, пяску і соляў, якія актыўна выкарыстоўваюць гарадскія камунальныя службы. Але нярэдкія на іх і сляды пазначэння сваёй тэрыторыі сабакамі.
Снег, добра насычаны брудам і соллю нярэдка застаецца на месцы росту дрэваў і газонах. Не дзіўна, што пасля гэтага шмат раслін альбо гіне, альбо знаходзіцца ў досыць кволым стане.
Тратуары ў цэнтры горада часта выглядаюць нібыта пакрытыя шэранню. Насамрэч гэта соль, якой пасля таяння снегу дыхаюць гараджане.
Непрыбраныя завалы нярэдка змяншаюць шырыню праезнай часткі на дарогах, выступаючы дзе на 20 сантыметраў, а дзе і на паўметры.
Як даведаўся Гомельскі Зялёны партал, за прыборкі горада ў такіх выпадках адказнае камунальнае аўтамабільнае ўнітарнае прадпрыемства па ўтрыманні дарог “ГорСАП”. Але ж сродкі на гэтае добраўпарадкаванне вылучае бюджэт адпаведных адміністрацый горада.
— Канешне гэта ўсё залежыць ад бюджэта. Безўмоўна адміністрацыі тых раёнаў, пад чыім кантролем знаходзяцца гэтыя вуліцы, тратуары і прыпынкі разумеюць, што за прыборку трэба плаціць, — пракаментаваў сітуацыю намеснік дырэктара “ГорСАП” па вытворчасці Мікалай Букетаў. — Калі ёсць сродкі, то мы з радасцю ажыццяўляем гэтую працу і заўжды йдзем ім на сустрач.
На жаль, на дадзены момант на гэта з іх боку сродкаў вылучана не было. У цэлым перспектыва такая, што будуць яшчэ больш моцныя снегапады. Магчыма ў сакавіку з’явіцца нейкае новае фінансаванне, нешта дадасца і будзем тады прыбіраць. Безумоўна ўсё мы не прыбярэм, але па меры магчымасцяў.
Магутныя снегапады, якія накрылі Гомель у першыя дні сакавіка “прыпудрылі” гэтыя горы і дапамаглі ім вырасці. Застаецца спадзявацца, што гарадскія ўлады вылучаць дастаткова фінансавання, каб ліквідаваць іх своечасова. Інакш назіраць за павольным знікненнем гэтых неэкалагічных завалаў давядзецца тыднямі.