Суполка падтрымкі асаблівых жывёл «Добры Леў» калісьці была створаная з адзінай мэтай і пад канкрэтнага сабаку-спінальніка — Льва, што патрапіў на ператрымку ў сям'ю Варвары.
Як прызнаецца дзяўчына, шчаня яны бралі на непрацяглы час, але пасля вырашылі пакінуць сабе. Як толькі Лёва стаў гаспадарскім і перайшоў на сямейнае забеспячэнне, суполку, якую заводзілі для збору дапамогі на аперацыю, лячэння і рэабілітацыю сабакі, было вырашана трансфармаваць для падтрымкі іншых апякуноў і гаспадароў жывёл з асаблівасцямі.
«Прыярытэтам для нас з'яўляецца не ўзрост жывёл, а тое, што іх выдзяляе сярод іншых, — інваліднасць ці хранічнае захворванне. Аднак мы стараемся падаваць усё ў пазітыўным ключы, бо слёзы ці жаль ім не патрэбныя!» — кажа яна.
Дзякуючы ж Лёве і нарадзілася ідэя рэкламнага фотапраекта. Па словах Варвары, неяк яна заўважыла, як выдатна выглядаюць на фотаздымках яе муж і сабака разам, абодва вельмі фотагенічныя.
«Ды й усе барадатныя людзі ў жыцці мне сустракаліся добрыя, спагадныя», — дадае дзяўчына.
Герояў у фотапраект дапамагло знайсці «сарафаннае» радыё. Усе яго ўдзельнікі на сёння — гэта знаёмыя сям'і Кулаевых ці сябры сяброў.
«Самыя звычайныя людзі самых розных прафесій: ад пісьменніка да каваля. Людзі, якія проста адгукнуліся на праект», — удакладняе Варвара.
Што ж тычыцца гадаванцаў з асаблівасцямі, то пра гісторыю і характар кожнага з іх можна даведацца ў апісанні пад фотаздымкам. Тут жа можна знайсці і кантакты апякуноў.
Праект не заканчваецца адной фотасесіяй. У планах яго стваральнікаў ужо ёсць ідэі для новай, якую таксама можна будзе пабачыць у суполцы «Добры Леў».