Недарэмна бабулі і мамы прымушаюць дзяцей есці супы, бо яны сапраўды аказваюць арганізму карысную паслугу: рэчывы, раствораныя ў вадзе, засвойваюцца значна хутчэй і эфектыўней. У халодную пару года гэта набывае асаблівую актуальнасць. Супы хутка саграюць, абагачаюць арганізм неабходнай яму цеплавой энергіяй, паляпшаюць абмен рэчывамі і кровазварот.
Таму не сумнявайцеся, што супы есці патрэбна, а гатаваць іх зусім не складана.
Для «начынкі» нам спатрэбяцца:
- 1 сярэдняя цыбуліна (можна парэй);
- 1 морквіна;
- брокалі;
- 2 сярэдніх сцябла салеры;
- 2-3 качанчыкі брусэльскай капусты;
- цвятная капуста;
- 1 чырвоны балгарскі перац.
Для «асновы» трэба ўзяць:
- 3 сярэднія бульбіны;
- 3-4 кубікі марожанага шпінату.
Каб прыгатаваць «начынку», неабходна моркву, перац, салеру і цыбулю нарэзаць кубікамі сярэдняга памеру, брокалі і цвятную капусту наламаць на больш дробныя кавалачкі. Затым на добра разагрэтую патэльню з маслам паслядоўна закідваем моркву, цыбулю, капусту брусэльскую, брокалі і цвятную капусту. Пастаянна памешваючы даводзім усё да паўгатоўнасці, дадаем на патэльню кубікі балгарскага перцу і салеры. Добра перчым і тушым да поўнай гатоўнасці. Можна прыправіць усё на свой смак.
Увага: «начынка» не соліцца. Дарэчы, прадукты лепш браць свежыя ці не моцна замарожаныя, каб яны захавалі сваю храбусткасць пры тэрмічнай апрацоўцы.
За час, што будзе смажыцца гародніна, чысцім бульбу і наразаем чацвярцінкамі для «асновы». У невялікую каструлю наліваем 0,5 літры вады, даводзім яе да кіпення, добра солім і закідваем бульбу. Калі яна будзе гатова, кідаем шпінатныя кубікі і праварваем яшчэ некалькі хвілін. Блэндэрам ператвараем бульбу са шпінатам у аднароднае пюрэ.
Увага: ваду не зліваем, каб пюрэ не было занадта густым.
Наступным этапам прыгатавання нашага супу стане спалучэнне «асновы» з «начынкай».
Акуратна выкладваем у міску падсмажаную гародніну, не больш 2 сталовых лыжак, стараючыся захапіць усе інгрыдыенты, і заліваем пюрэ. Суп можна ўпрыгожыць парэзанай калечкамі памідоркай чэры і лісцікамі свежага базіліку, сухарыкамі з жытнёвага хлебу ці злёгку абсмажанымі гарбузовымі семачкамі.
Смачна есці!