Такім чынам громкая гісторыя на шоў ВДВ у Брэсце набыла працяг.
Як паведамляе АПБ на сваім сайце, да іх, як да буйнейшай прыродаахоўнай арганізацыі ў Беларусі, пачалі звяртацца грамадзяне з просьбай разабрацца ў выпадку жорсткага абыходжання з жывёламі на паказальным выступленні дэсантнікаў, пакараць віноўных і паспрыяць, каб у будучым сітуацыя не паўтаралася.
Згодна з беларусім заканадаўствам, звароты юрыдычных і фізічных асоб разглядаюцца сур'ёзна. Таму кожны неабыякавы чалавек можа сам звярнуцца ў Міністэрства абароны краіны і ГУУС па горадзе Брэсце, напісаць зварот і выказаць сваю нязгоду.
У грамадскай арганізацыі лічаць важным як мага шырэй паведаміць пра выпадак і патрабаваць пакарання віноўных. Асабліва з улікам, што выступленне, на якім сілавікі разрывалі жывых жаб і вужоў, адбывалася на вачах у дзяцей. Не выключаны паўторныя выпадкі падобных шоў, якія будуць абгрунтоўвацца тым, што "ім было можна".
Акрамя гэтага, у папярэднія гады ВДВ дэманстравалі свае ўменні і навыкі цалкам іншымі спосабамі: ляжалі на цвіках, разбівалі рукамі і галовамі цэглу і шыфер.
Даведка: з пункту гледжання закона такое "шоў" патрапляе пад артыкул 339/1 "Жорсткае абыходжанне з жывёламі":
- жорскае абыходжанне з жывёламі, што прывяло да яго гібелі ці калецтва, было здзейснена з хуліганскага, карыснага ці іншага намеру альбо ў прысутнасці заведама малалетняга, - караецца грамадскімі работамі, альбо штрафам, альбо папраўчымі работамі на тэрмін да аднаго года, або арыштам.
- тое ж дзеянне, здзейсненае паўторна або групай асоб, - караецца арыштам, альбо абмежаваннем свабоды на тэрмін да аднаго года, альбо пазбаўленнем свабоды на той жа тэрмін.