Хлопцы расказалі, што другі дзень запар вось такім чынам ловяць маладых карасёў, каб перанесці іх у большы па памерах вадаём. Па словах васьмікласніка Ніўскай базавай школы Дзяніса Кнышова, нядаўна ён разам са сваім сябрам, вучнем Кругавец-Калінінскай сярэдняй школы Данілам Краўцовым, прыкмецілі, што рыбы ў абмялелым за лета вадаёме гінуць. Хлопчыкі, як сапраўдныя рупліўцы роднай прыроды, вырашылі, па меры магчымасці ратаваць маўклівых палоннікаў.
За час, праведзены ў кампаніі падлеткаў, я ўбачыў каля 15 вылаўленых карасікаў. Праўда, аднаго з іх прама з-пад носа выратавальнікаў украў вясковы кот, які сядзеў побач з рабятамі…
Працавалі дзеці без перапынку і стомы. Вельмі ўжо хацелася ім прынесці карысць роднай прыродзе. Такое жаданне школьнікаў выклікае толькі павагу да іх, іх бацькоў і педагогаў. Цудоўна, што падлеткі перажываюць за звяроў, птушак і рыб, праяўляюць клопат пра ўсё, што акружае нас і робіць жыццё яркім і паўнавартасным.