27.05.2016 / 16:05

У беларускай традыцыйнай кухні бліны займаюць асобае месца. Акрамя таго, што яны могуць быць упадабанай стравай на кожны дзень, у старажытнасці мелі асаблівы сімвалізм у народных святах і абрадах. Так, з дапамогай блінцоў дзяўчаты варажылі на Каляды, у Шчодры вечар гаспадар на парозе дома з імі ў руках клікаў Мароз. Не абыходзілася без іх і праводзіны зімы, і сустрэча вясны, бо румяны блін здаўна лічыўся сімвалам Сонца. Аднак сёння праект «VeganFood» прапануе не зусім звычайныя бліны — з дадаткам шпінату ў цеста і начынкай з гародніны.

Няхай сабе шпінат пакуль не мае такой харчовай папулярнасці, як напрыклад, у тых жа Злучаных Штатах, але паступова ён усё ж прыжываецца ў рацыёне не толькі вегетарыянцаў і веганаў. І невыпадкова, бо гэта расліна валодае багатай разнастайнасцю розных карысных рэчываў і вітамінаў. Дзякуючы чаму шпінат нармалізуе вугляводны абмен, абараняе слізістыя абалонкі, дапамагае спраўляцца са стрэсам і губляць вагу, выводзіць таксіны і шлакі з арганізму.

Лісты шпінату ўтрымліваюць шмат бялка, больш яго можна знайсці толькі ў бабовых. Багата расліна і на ёд, што добра для шчытападобнай залозы. Акрамя гэтага, вітаміны А і С у шпінаце валодаюць выдатнай стойкасцю да ўздзеяння тэмпературай, гэта значыць, што яны добра захоўваюцца пасля тэрмічнай апрацоўкі.

Для шпінатных блінцоў з начынкай з гародніны нам спатрэбяцца:

  • мука;
  • шклянка вады;
  • шпінат;
  • 1 сярэдняя цыбуліна;
  • 1 сярэдняя морквіна;
  • 4-5 шампіньёны ці любыя іншыя грыбы.

Калі не атрымаецца знайсці свежы шпінат, загадзя размаражваем кубікаў 10-15 марожанага. Замешваем цеста з мукі і вады, добра размешваем і дадаем туды зеляніну (можна разам з вадзічкай, якая атрымаецца пры размарозцы). Каб цеста стала аднародным, яго можна ўзбіць блэндэрам.

  • Увага: цеста павінна атрымацца даволі густым і раўнамерным па складу шпінату і мукі. Не забываем пасаліць яго.

Чысцім цыбулю і моркву, мыем грыбы. Пакуль грыбы крыху падсыхаюць, дробна наразаем цыбулю, а моркву націраем на «бурачную» тарку. Грыбы рэжам уздоўж тонкімі скрылькамі.

Ставім на пліту дзве патэльні і добра разаграваем іх.

Наліваем алей у адну з разагрэтых патэлень і закідваем усю гародніну, дадаем спецыі па смаку. Абсмажваем да поўнай гатоўнасці.

  • Увага: грыбы пры тэрмічнай апрацоўцы могуць даць вады, таму варта не перастарацца з алеям.

На другую патэльню таксама наліваем алей і выліваем чарпак цеста — гэта наша «порцыя» на адзін блін. Размяркоўваем цеста па ўсёй плошчы патэльні не вельмі тонкім слоем. Калі падсмажыцца адзін бок бліну, пераварочваем на другі.

  • Увага: калі пры пераварочванні блін рвецца, можна дадаць яшчэ крыху мукі. Такім чынам насмажваем кіпу блінцоў.

Затым асцярожна пачынаем заварочваць у іх гатовую начынку. Дзеля гэтага бярэм сталовую лыжку начынкі і размяркоўваем яе па сярэдзіне бліна, пасля акуратна складваем «канверт», па чарзе загінаючы краі.

Нашынкаваныя блінцы выкладаем зноў на разагрэтую патэльню і абсмажваем да залацістай скарынкі. Пры гэтым алей ужо можна не наліваць, так як яго дастаткова ў начынцы і саміх блінцах.

Падаваць блінцы можна са свежай зелянінай, напрыклад кропам, рукалай ці лусткамі салеры, а таксама балгарскім перцам, што крыху асвяжыць страву.

Смачна есці!

Автор:
Фотограф:
Хрысціна Чарняўская
Листайте дальше, чтобы прочитать следующую новость