І так, пачнем з закусак і салатаў, якія дазволяць вашым гасцям крыху падсілкавацца перад асноўнымі стравамі.
Сачавічная намазка
Нам спатрэбяцца:
- 2-3 шклянкі сачавіцы;
- 2 сярэднія морквіны;
- 1 цыбуліна;
- 2-3 зубчыкі часнаку.
Сачавіцу можна загадзя замачыць на некалькі гадзін. Затым ставім зерне варыцца ў невялікай каструльцы. У гэты ж час чысцім і мыем моркву, націраем на буйную тарку і абсмажваем. Пачышчаную цыбулю і зубчыкі часнаку дробна наразаем і дадаем да морквы абсмажвацца. Калі ўсе інгрыдыенты будуць гатовыя, блэндэрам узбіваем у пюрэ.
Пры гэтым не забываем дадаць солі і спецый па смаку.
Увага: каб намазка не атрымалася занадта сухой, усю ваду, у якой варылася сачавіца, можна не зліваць цалкам. Дарэчы, па жаданню ў намазку можна дадаць абсмажаныя грыбы, напрыклад, шампіньёны ці вараную браколі.
На стол страву падаем разам з злёгку абсмажанымі скрылькамі багету ці чорнага хлеба, упрыгожыўшы зялёнай пятрушкай, тонка парэзаным агурком ці памідоркай.
Баклажанавыя рулеты з нутавай пастай і грэцкім арэхам
Нам спатрэбяцца:
- 1-2 сярэдніх баклажаны;
- 1,5 шклянкі нуту;
- 2-3 зубчыкі часнаку;
- пучок кінзы;
- 1 сталовая лыжка кунжутных семачак;
- 1,5 сталовых лыжкі грэцкіх арэхаў сярэдняга памолу;
- 2-3 чайныя лыжкі лімоннага соку.
Загадзя замочаны нут ставім варыцца да поўнай гатоўнасці. Злёгку абсмажваем кунжутныя семачкі і перамелем іх у пюрэпадобную масу, затым дадаем дробна нарэзаную кінзу, зубчыкі часноку і перамелем яшчэ раз. У гатовы нут дадаем масу з кунжуту, часнаку і кінзы і блэндэрам узбіваем усе інгрыдыенты ў пасту, папярэдне пасаліўшы і дадаўшы лімонны сок. Даем астыць. У гэты ж час баклажаны наразаюцца на тонкія скрылькі ўздоўж, націраюцца чорным перцам і абсмажваюцца на сярэднім агні. Калі баклажанавыя скрылькі будуць гатовыя, акуратна кладзем у іх нутавую пасту і скручваем рулецікі, якія перад падачай пасыпаюцца грэцкім арэхам. Страву можна ўпрыгожыць таксама зялёным базілікам ці пятрушкай.
Увага: каб паста не атрымалася вельмі сухай, ваду, у якой варыўся нут, можна не зліваць цалкам.
Спаржавая фасоля з кунжутам і часнаком
Нам спатрэбяцца:
- спаржавая фасоль (свежамарожаная);
- 2-3 зубчыкі часнаку;
- 1,5-2 сталовыя лыжкі кушжутных семачак.
Абсмажваем спаржавую фасоль да поўнай гатоўнасці. Асобна злёгку абсмажваем кунжутныя семачкі. Зубчыкі часнаку рэжам вельмі дробна. Затым змешваем усе інгрыдыенты разам і яшчэ некалькі звілін падсмажваем на малым агні. Солі і спецыі дадаем па смаку.
Да стравы можна падаць парэзаны салодкі балгарскі перац ці памідоркі чэры.
Веганскія канапэ
Нам спатрэбяцца:
- памідоры чэры;
- 1 свежы агурок;
- аліўкі ці масліны;
- тофу.
Тофу наразаем невялікімі квадратамі, агуркі — кольцамі таўшчынёй з мезінец. Затым нанізваем на шпажкі інгрыдыенты ў наступнай паслядоўнасці: тофу, агурок, аліўка ці масліна і памідорка чэры. Можна дадаць таксама паміж слаямі лісцік зялёнага базіліку.
Салата з фасоллю
Нам спатрэбяцца:
- фасоль кансерваваная ў сваім соку;
- 2-3 сярэднія морквіны;
- корань салеры;
- 1 яблык (жоўты ці зялёны);
- зялёны ліставы салат;
- 0,5 чайныя лыжкі гарчыца;
- лімонны сок;
- 2-3 зубчыкі часноку;
- зеляніна;
- 3 лыжкі алею.
Адварваем морквіны, затым наразаем яе невялікімі кубікамі разам з яблыкам і корням салеры. Салат рвем на буйныя кавалкі. Дадаем фасоль, папярэдне зліўшы вадкасць. У запраўку для салата пойдуць наступныя інгрыдыенты: зубчыкі часнаку дробна наразаем і пераціраем з соллю, дадаем гарчыцы, алей і лімонны сок, усё добра перамешваем.
Да стала страву падаюць з багетам.
Асноўныя стравы больш сытныя, але ніякіх складанасцяў ў іх прыгатаванні няма.
Бульбяное пюрэ са шпінатам
Нам спатрэбяцца:
- бульба;
- шпінат свежамарожаны.
Чысцім і адварваем бульбу як звычайна, не забываем пасаліць. Зліваем з каструлі ваду, але не ўсю. Загадзя размарожваем шпінат і дадаем яго да бульбы, а затым узбіваем усё ў пюрэ. Пры неабходнасці дасольваем і пярчым. Калі пюрэ атрымоўваецца сухаватым, можна даліць крыху кіпня і алею.
Рыс з грыбамі
Нам спатрэбяцца:
- рысавая крупа;
- грыбы (шампіньёны);
- 1-2 сярэднія морквіны;
- 1 сярэдняя цыбуліна;
- таматная паста.
Ставім варыць рыс. У гэты час чысцім моркву і націраем яе на буйную тарку. Чысцім цыбулю і дробна наразаем. Закідваем на патэльню з алеем. Добра мыем, а затым рэжам дробна шампіньёны і дадаем на патэльню. Калі смажанка будзе гатова, разводзім крыху таматнай пасты ў вадзе і заліваем ў патэльню, даем яшчэ некалькі хвілін патаміцца. Затым у гатовы рыс кладзем смажанку з таматнай пастай і добра перамешваем. Не забываем усё пасаліць і дадаць спецый па смаку.
Катлеткі з сачавіцы з морквай і буракоў з арэхамі
Нам спатрэбяцца для сачавічных катлет з морквай:
- 0,5 шклянкі сачавіцы;
- 2-3 сярэдніх морквы;
- 1 невялікая цыбуліна;
- манка ці аўсяная крупа;
- паніровачныя сухары.
Адварваем сачавіцу і моркву да поўнай гатоўнасці, солім і дадаем спецыі па смаку. Цыбулю чысцім і дробна рэжам, затым абсмажваем да залатога колеру і дадаем да сачавіцы і морквы. Усыпаем манную крупу ці аўсяную і ўзбіваем усе інгрыдыенты ў пюрэ, можна не аднароднае па саставу. Змочваем рукі халоднай вадой і з атрыманага «фаршу» робім катлеткі, абвальваем у сухарах і абсмажваем некалькі хвілін на добраразагрэтай патэльні з алеем.
Нам спатрэбяцца для бурачных катлет з арэхамі:
- 4-5 сярэдніх бурачкі;
- 2-3 зубчыкі часнаку;
- 1 невялікая цыбуліна;
- манка ці аўсяная крупа;
- грэцкія арэхі сярэдняга памолу;
- паніровачныя сухары.
Адвараныя бурачкі пераціраем на дробную тарку, дадаем манку ці аўсяную крупу, перамолатыя грэцкія арэхі. Чысцім і дробна рэжам цыбулю і часнок, затым часнок дадаем у бурачны «фарш». Цыбулю абсмажваем да залацістага колеру і таксама дадаем да бурачкоў. Усё вельмі добра перамешваем. Змочваем рукі халоднай вадой і лепім катлеткі з атрыманага «фаршу», абвальваем у сухарах і абсмажваем некалькі хвілін на добра разагрэтай патэльні з алеем.
Дарэчы, катлеткі з гародніны можна гатаваць і ў параварцы.
Саевае мяса пад таматным соўсам
Нам спатрэбяцца:
- соевыя стэйкі ці біфштэкс;
- 2-3 памідоры;
- 1 цыбуліна;
- 1 перац салодкі балгарскі;
- таматная паста.
Стэйкі ці біфштэкс заліваем кіпнем і даем пастаяць 30-40 хвілін у закрытым крышкай посудзе. Затым выкладваем у глыбокую патэльню з вадой і гатуем да поўнай гатоўнасці соевага мяса. Чысцім і наразаем цыбулю тонкімі паўкольцамі, закідваем у патэльню да соі і даліваем крыху алею. Чысцім і рэжам тонкімі палоскамі балгарскі перац, таксама закідваем у патэльню. Калі перац і цыбуля будуць гатовымі, дадаем памідоры, парэзаныя не вельмі буйнымі долькамі. Солім і перчым (можна дадаць вострага чырвонага перцу, але акуратна), па жаданню закідваем у страву зялёны базілік і пятрушку. Калі памідоры стушацца, разводзім таматкую пасту кіпячонай вадой і дадаем у патэльню. Туды ж кідаем духмяны перац гарошкам, лаўровы ліст і крыху гваздзікі. Усё разам тушым пад крышкай яшчэ некалькі хвілін.
Увага: неабходна сачыць, каб у патэльні з соевым мясам пастаянна была вада, пры неабходнасці даліваем кіпячоную.
Браўні
На дысерт падайце сваім гасцям торт з кавалачкамі чорнага шакаладу.
Нас спатрэбяцца:
- 2 шклянкі мукі;
- 3/4 шклянкі какао;
- 1 чайная лыжка солі;
- 1 чайная лыжка гашанай соды;
- 1 чайная лыжка ванілі;
- 1 шклянка алею;
- 1 шклянка вады;
- плітка чорнага шакаладу.
Замешваем цеста, паступова дадаючы ўсе пералічаныя інгрыдыенты. Плітку чорнага шакаладу ламаем на сярэднія кавалкі і таксама дадаем у цеста. Затым выліваем яго ў добра разагрэтую форму і ставім на 25-30 хвілін запякацца ў духоўку пры тэмпературы 180-200 градусаў.
Увага: ні ў якім разе не ператрымайце торт у духоўцы, у яго павінна ўтварыцца скарынка, а сярэдзіна застацца мяккай. Дарэчы, разам з шакаладам у цеста можна дадаць вішню.
Падаваць торт можна, упрыгожаўшы малінай, ажынамі, буякамі, пасыпаць цукровай пудрай, какао ці паліць зверху растопленым чорным шакаладам.
Смачна есці і вясёлых святаў!
ЧЫТАЙЦЕ ТАКСАМА: