Выставу немагчыма не заўважыць: насупраць галоўнага ўвахода ў гандлёвы цэнтр – стэнды на драўляных ножках з вялікімі фотаздымкамі, яскравай інфаграфікай, цікавымі тэкстамі. Атмасферу стварае пара кашуль з назвай экспазіцыі. Можна даведацца пра шведскія брэнды, якія ідуць па шляху эка-вытворчасці, і праблемы, з якімі яны сутыкаюцца.
Некаторыя тэксты рвуць шаблон. Напрыклад: “Адзенне традыцыйна вырабляецца з натуральных, сінтэтычных валокнаў, або іх сумесі. Натуральныя валокны лічацца больш экалагічнымі, паколькі яны аднаўляльныя і біяраскладальныя, але ў рэальнасці ўсё складаней. Для вырошчвання натуральных валокнаў можа спатрэбіцца велізарная колькасць вады, хімічных рэчываў і энергіі”.
Бадай, галоўная ідэя выставы – папулярызацыя эканомікі замкнёнага цыклу. На адным са стэндаў можна прачытаць наступнае:
“У індустрыі моды дамінуе лінейная структура, “узяць, зрабіць, выкінуць”.
Лінейная бізнэс-мадэль прадугледжвае марнаванне вялікай колькасці абмежаваных рэсурсаў, яна неўстойлівая з эканамічнага, гуманітарнага і экалагічнага пунктаў гледжання. Важна перайсці да цыркулярнай эканомікі, у якой кожная сувязь у ланцужку стварэння кошту звязана ў цыкл закрытага тыпу, дададзеная вартасць захоўваецца як мага даўжэй, а колькасць адкідаў памяншаецца”.
Цыркулярная эканоміка моды ўключае ў сябе паведічэнне колькасці бізнэс-мадэляў, якія прапануюць альтэрнатыву спажыванню новай моды. Арганізатары выставы раяць:
“Выбірайце сэканд-хэнды як мага часцей, бо гэта найбольш выгадна для навакольнага асяроддзя, і арандуйце або пазычайце адзенне, якім вы будзеце карыстацца толькі зрэдку”.
А ў шведскіх сэкандах, дарэчы, можна набыць не толькі адзенне. Па асартыменце тавараў яны нагадваюць савецкія камісіёнкі ці крамы канфіскату: прадаецца усё, ад мэблі да посуду. Але маштабы значна, значна большыя. Нямала пахадзіўшы па крамах сетак Myrorna i Humana ў 2009-м, магу засведчыць асабіста. Да таго ж, кошты часта ўмоўныя.
Да сённяшняга дня мала што памянялася.
На адкрыцці выставы “Рэвалюцыя моды” прысутнічала амбасадарка Швецыі ў Беларусі Крысціна Юханесан. Яна распавяла пра бягучыя і будучыя экалагічныя праекты Амбасады. У планах – пазнаёміць беларусаў праз сацыяльныя сеткі з канцэпцыяй устойлівай кухні. Гэта трэнд у Швецыі: шэф-павары прапагандуюць такі падыход да працы, калі выкарыстоўваюцца ўсе прадукты без адкідаў.
Выстава “Рэвалюцыя моды – на шляху да цыркулярнай эканомікі” працуе ў Dana Mall (вуліца Мсціслаўца, 11, метро Усход) да 20 кастрычніка. Яна праходзіць у межах Тыдня Моды ў Беларусі. Праект рэалізуецца Амбасадай Швецыі ў Мінску ў супрацоўніцтве з Беларускай палатай моды пры падтрымцы Шведскага Інстытута.