“Нёман труцяць, а ўсе маўчаць”. Гродзенскі гісторык хоча, каб людзі ведалі пра экалагічна-небяспечную сітуацыю

Плакат “Неман отравлен Лидским ЖКХ” з’явіўсяся на парэнчах Старога маста ў Гродне каля палудня 18 чэрвеня. Яго павесіў гродзенскі гісторык Мечыслаў Супрон. “Хачу праінфармаваць людзей, што адбываецца экалагічная катастрофа, пра якую маўчаць улады.

Праз трубу, што упадае ў раку Лідзейку, зліваюцца адходы. Потым вада ідзе ў Дзітву, якая ўпадае ў Нёман. У Дзітве ўжо падохла ўся рыба, а на Нёмане людзі купаюцца і не ведаюць пра небяспеку, якую можа прынесці забруджаная вада”, – кажа Мечыслаў.

Па словах гісторыка, мясцовыя жыхары Бярозаўкі і Ліды звярталіся ў прыродаахову, але там патлумачылі мор рыбы надзвычайна высокай тэмпературай паветра. Маўляў, у вадзе не хапае кіслароду і праз гэта рыба гіне.

Таксама гісторык расказаў, што купанне ў Нёмане каля Бярозаўкі скончылася для яго сына хваробаю, ды і сам Мечыслаў кепска сябе адчуваў.