----- Account: greenbelarus.info -----

Восеньская акцыя «Зробім!»: дзе ў Мінску стала чысцей

1 кастрычніка Беларусь зноў ахапіла ліхаманка валанцёрскіх уборак, якія праходзяць у межах акцыі «Зробім!». Можа, яны аказаліся і не такімі масавымі, як вясной, але дакладна прайшлі з добрым настроем і ў сонечнае надвор'е. Зялёны партал сабраў невялікую справаздачу пра тое, што і дзе прыбіралі гараджане ў Мінску.

01.10.2016 Экалогія горада Аўтар: Хрысціна Чарняўская Фота: Анора Лангар, Ганна Дапшэвічуце, Хрысціна Чарняўская, Надзея Дубоўская

Першы дзень кастрычніка падарыў неверагодна цёплае і сонечнае надвор'е, якраз такое, калі хочацца выбрацца на прыроду, злавіўшы апошнія прямяні. І ў Мінску знайшліся тыя, хто ў гэты дзень паехаў не проста адпачыць, а пакінуць чысты след пасля сябе і хоць крыху дапамагчы наваколлю падрыхтавацца да зімы.

Акцыя «Зробім!»  ужо пяты год праводзіцца ў Беларусі і з кожным разам набірае ўсё больш прыхільнікаў, якія ўсведамляюць, што смецце ў зялёных зонах і лясах з'яўляецца не само па сабе: там яго пакідаюць людзі.

Нягледзячы на тое, што вясной ужо прайшла падобная акцыя, у якой прыняла ўдзел рэкордная колькасць людзей — 23 тысячы, на жаль, пасля летняга сезону на тых жа месцах можна зноў убачыць смецце.

Як зазначаюць у арганізацыйным камітэце «Зробім!», так адбываецца па некалькіх прычынах. Па-першае, з-за нізкай экалагічнай культуры людзей, адсутнасці ў іх разумення таго, што прыбіраць за сабой трэба, што прырода не паглыне ўсе рэшткі адпачынку. Па-другое, кантэйнеры для смецця ўсталяваныя не ўсюды, а людзям лянота збіраць і вывозіць адходы самастойна.

І здараецца так не толькі па-за горадам. Таму сталічныя лясныя масівы і паркавыя зоны — на асаблівым кантролі ўдзельнікаў «Зробім!».

Гэтым разам у Мінску было ажно некалькі буйных кропак, дзе прайшла акцыя: Срэбны лог і Малінаўка.

Да сумеснай уборкі кампаніі «Гарадскі Ляснічы» Таварыства «Зялёная сетка» і грамадскай арганізацыі «Багна» падключыліся каля 70 чалавек, што, улічваючы колькасць смецця ў Срэбным логу, было зусім не лішнім.

Перад пачаткам акцыі для яе ўдзельнікаў аргнітолагі з ГА «Ахова птушак Бацькаўшчыны» правялі экскурсію па Лошыцкім парку, паведаўшы пра мясцовых птушак. Затым усе адправіліся ў гушчар, дзе атрымалася сабраць неверагодную колькасць смецця — амаль цэлую тону.

Для тых, у каго засталіся сілы і імпэт, правялі майстар-клас па скандынаўскай хадзьбе. Арганізатары паклапаціліся, каб пасля насычанага працоўнага дня кожны змог падсілкавацца сушы ці салодкімі прысмакамі гарбатай.

У Малінаўцы адбыліся адразу дзве ўборкі. Традыцыйным месцам для адной з іх стаў лясны масіў ля аўтарынка. Сюды разам са сваімі супрацоўнікамі і валанцёрамі выйшла каманда сайта аб'яў «Куфар». Час ад часу да акцыі далучаліся людзі, што проста прыйшлі ў лес адпачыць і пагуляць.

Бадай што, зусім нечаканай апынулася для іх сустрэча з мясцовым лесніком, які быў вельмі ўражаны і ўдзячны за ўборку лесу. Ён паказаў валанцёрам яшчэ некалькі звалак, якія былі «прыхаваныя» ў гушчары.

Яшчэ адну кропку ў гэтым раёне адзначылі мясцовыя актывісты ў яблыневым садзе па вуліцы Рафіева. Акрамя звычайнага смецця ад адпачываючых была вынадзейная пляцоўка з будаўнічымі адходамі: шыферам, драўлянымі аконнымі рамамі і мэбляй.

\

Сваю ўборку зладзілі і на экалагічнай сцежцы, што з'явілася сёлета ў Каменнай Горцы пры храме свяціцеля Мікалая Японскага. З большага смецце тут пакідаюць мясцовыя жыхары, што любяць адпачыць у зацішшы і зарасцях логу. Актывісты сабралі рэшткі шкла, ПЭТ-бутэлькі, а таксама расчысцілі месцы ад вогнішчаў і сцежкі ад лістоты.

«Смецце тут прыбіраецца пастаянна, стаяць кантэйнеры, таму адносна чыста. Але ўсё ж сустракаюцца нейкія сляды пасля аматараў адпачыць», — пракаментаваў адзін з актывістаў.

Не абыйшлося гэтым разам і без велаўборкі. Аж 25 кіламетраў вырашылі праехаць веласіпедысты па лясах Уручча і прыбраць 6 кропак, дзе загадзя былі знойдзеныя невялікія несанкцыянаваныя звалкі.

«У асноўным там ПЭТ-бутэлькі. Але мы дакладна збіраемся раздзяляць усё сабранае смецце, спадзяюся, так робяць і іншыя», — зазначыў Джон Росмэн перад стартам ля Нацыянальный бібліятэкі.

Невялікую лакальную ўборку правялі мясцовыя жыхары ў скверы «Котаўка». Літаральна за гадзіну яны сабралі каля 10 пакетаў са смеццем: у асноўным гэта былі шкляныя бутэлькі і шклабой, а таксама акуркі. Актывісты пастараліся максімальна рассартыраваць па асобным пакетам.

Недалёка ад Мінска, у Сеніцы, сумесную ўборку правялі супрацоўнікі ўстановы «Цэнтр экалагічных рашэнняў», Мінпрыроды, ГУ «Аператар другасных матэрыяльных рэсурсаў» і мясцовага фонда «Інтэракцыя».

«На папярэдняй акцыі «Зробім!», што прайшла 9 красавіка, у Сеніцы таксама прыбіралі. Прайшло 5 месяцаў, і смецця тут зноў шмат. У Мінпрыроды паабяцалі кантраляваць гэтае месца і ўсталяваць на самых брудных пляцоўках дадатковыя кантэйнеры», — распавяла Зялёнаму парталу Надзея Дубоўская з Цэнтра экалагічных рашэнняў і аргкамітэта «Зробім!».

Фота Надзеі Дубоўскай

Смецце прыбірае сам міністр прыродных рэсурсаў Андрэй Каўхута. Фота Надзеі Дубоўскай

Фота Надзеі Дубоўскай

Фота Надзеі Дубоўскай

У хуткім часе на нашым сайце з'явіцца больш падрабязная інфармацыя і дакладныя лічбы па выніках акцыі «Зробім!» па ўсёй Беларусі.

Але арганізатары нагадваюць, што прыбіраць смецце можна ў любы зручны дзень і час, не прывязваючыся строга да канкрэтных дат.

Падзяліцца: 01.10.2016

Перадрук матэрыялаў магчымы пры абавязковай наяўнасці зваротнай і актыўнай гіперспасылкі.