Па якім крытэрыі адбіраліся птушкі-прэтэндэнты?
Від-сімвал павінен быць у першую чаргу цікавы, прыгожы, прыцягальны, абавязкова гнездаваць на тэрыторыі Лідскага раёна. Ну і назва павінна быць мілагучнай. Я хацеў прапанаваць яшчэ і малую коўру. Але па-руску яна называецца «малая поганка», што не вельмі прыемна гучыць. Хаця сам від, безумоўна, прыгожы і цікавы.
Чым адметныя для Лідчыны прапанаваныя віды?
Цецярукі — звычайныя, але не шматлікія на гнездаванні птушкі. На тэрыторыі Лідскага раёна мне вядома прынамсі толькі тры месцы, дзе можна вясной паназіраць за іх токам. Хацелася б, каб такіх месцаў было больш, як і саміх птушак. Таму і прапанавалі.
Сокал-кабец — рэдкі від, занесены ў Чырвоную Кнігу. Птушкі сустракаюцца на Лідчыне кожны год. Складаней заўсёды адзначыць на гнездаванні, бо птушкі вельмі асцярожныя. Дарэчы, у пазамінулым годзе пашчасціла зарэгістраваць цікавы выпадак гнездавання гэтых птушак на адной з апор лініі электраперадач. Абранне сімвалам дазволіць прыцягнуць да іх праблем больш увагі.
Кулік-случок, рачная крычка, балотны лунь — звычайныя віды. Гняздуюць як у самой Лідзе, так і яе ваколіцах, на Нёмане і Дакудаўскім балоце ў дастатковай колькасці. І людзям яны часта трапляюцца на вочы. Але пра іх мала ведаюць. Добрая нагода пазнаёміцца з імі або даведацца пра іх больш.
Фотапаляванне на птушак: Як лавіць добрыя кадры (+ прыгожыя фотаздымкі)
У лідскім райвыканкаме на паседжанні камісіі, дзе былі прадстаўлены заяўленыя віды, прапанавалі яшчэ два віды ў якасці «кандыдатаў»: вялікую белую чаплю і дразда-піскуна. Белая чапля — нядрэнная ідэя. Прыгожая птушка, часта сустракаецца і добра пазнавальная сярод людзей.
А вось што датычыцца дразда-піскуна, то мяркую, гэта не лепшы варыянт. Від шырока паўсюль распаўсюджаны, асабліва ў нашых парках, але занадта банальны для сімвала.
У любым выпадку рашэнне прымаць жыхарам Лідчыны падчас галасавання, якое мясцовыя ўлады плануюць правесці на старонках «Лідскай газеты» і ў сацыяльных сетках. А мы будзем уважліва сачыць за вынікамі.