Звыклы нам салодкі перац валодае вялікай колькасцю вітамінаў: С, В1, В2, В9, Р, РР і карацінам. Прычым па ўтрыманню вітаміна С перац нашмат багацей за лімон і чорную парэчку. Таму яго абавязкова трэба ўключаць у меню людзям, якія хварэюць цукровым дыябетам, пакутуюць ад дэпрэсіі, бяссоніцы, знясіленыя. Карысны перац і пры захворваннях крыві, крывацёку дзёснаў, ломкасці сасудаў, бо змяшчае аскарбінавую кіслату ў спалучэнні з вялікай колькасцю вітаміна Р. Ён стымулюе выдзяленне страўнікавага соку, дапамагае страваванню ў цэлым. Невыпадкова яго рэкамендуюць пры гастрытах, анеміі, запорах, коліках кішэчніка, дзякуючы ўтрыманню мінеральных соляў калію, а таксама кальцыю, магнію, фосфару, жалеза, ёду і іншых. Акрамя гэтага, перац супакойвае нервы.
Для 3 порцый фаршырованых перцаў нам спатрэбяцца:
- 3 сярэднія па памеру салодкія перцы;
- невялікі цукіні (ці палова сярэдняга кабачка);
- паўбаклажана;
- сярэдняя морквіна;
- сярэдняя цыбуліна;
- 100-200 г шампіньёнаў;
- сяродні памідор;
- 1/2 шклянкі рысу;
- соль і молаты перац па смаку;
- лаўровы ліст;
- перац гарошкам;
- алей.
Чысцім цыбуліну, наразаем максімальна дробна і закідваем на разагрэтую патэльню з невялікай колькасцю алею. Мыем шампіньёны і стараемся нарэзаць іх кубікамі, дадаем да цыбулі. Гатуем да таго моманту, пакуль з грыбоў не сыдзе вада. Мыем кабачок, баклажан, чысцім морквіну, наразаем іх кубікамі сярэдняга памеру і зноў жа закідваем на патэльню да цыбулі і грыбоў. Як толькі гародніна дойдзе да паўгатоўнасці, дадаем нарэзаны памідор і падсмажваем яшчэ хвілін 5.
Добра прамываем рыс. Заліваем у патэльню з гароднінай паўшклянкі кіпеню і закідваем крупу. Акуратна ўсё памешваючы, даводзім да паўгатоўнасці рыс. Стараемся «выпарыць» ваду, дзеля чаго лепш гатаваць на высокім агні. Не забываем пасаліць і папярчыць начынку па смаку.
Пакуль будзе падсмажвацца начынка, мыем і чысцім перцы, акуратна выдаляючы ўсе зярняткі.
Увага: пастарайцеся зрэзаць верхавінку перца не вельмі тонка, і можна не прыбіраць хвосцік — усё гэта паслужыць «шапачкай» для нафаршыраваных перцаў.
Як толькі гародніна з рысам будзе гатова, начыняем перцы, добра ўтрамбоўваючы і запаўняючы іх па краі зрэзу. Накрываем перцы «шапачкамі» з верхавінкі і кладзем у каструлю. Наліваем вады роўна столькі, каб перцы былі на 1/4 «закрытыя» ёй, накрываем каструлю крышкай і ставім на пліту.
Варым прыблізна 40 хвілін, як толькі «шапачкі» перцаў стануць мяккімі. У самым канцы ў ваду кідаем гарошкі перцу і лаўровыя лісцікі, крыху падсольваем.
Гатовыя перцы можна падаваць, пасыпаўшы іх зелянінай, з кетчупам ці любым іншым, але не вострым соўсам.
Пры жаданні ў начынку можна дадаць яшчэ соевы фарш, а ў канцы гатавання ў ваду сталовую лыжку таматнай пасты.
Смачна есці!