Беларуская партыя «Зялёныя» патрабуе неадкладна спыніць будаўніцтва АЭС у Астраўцы і здаць пашкоджаны корпус рэактара на металалом

У сувязі з падзеннем корпуса рэактара на Беларускай АЭС і стратай даверу да дзяржаўнай карпарацыі «Расатам» Беларуская партыя «Зялёныя» зрабіла заяву з патрабаваннем неадкладнага спынення будаўнічых прац. На думку «зялёных», беларускі бок наўмысна ўводзяць у зман і не выконваюць абяцанняў па 100%-най якасці і бяспечнасці атамнай станцыі ўжо на пачатковых этапах яе ўзвядзення.

08.08.2016 Грамадства Аўтар: Беларуская партыя «Зялёныя» Фота: Адкрытыя інтэрнет-крыніцы

Спачатку інфармацыя пра надзвычайнае здарэнне пры будаўніцтве Беларускай АЭС замоўчвалася, калі звесткі трапілі ў інтэрнэт, карпарацыя «Расатам» адмаўляла сур’ёзнасць адбыўшагася. Калі адмаўляцца стала немагчыма, пачала блытацца ў фармулёўках і гуляць словамі: не ўпаў з вышыні 4 метраў, а «сутыкнуўся з зямлёй і праслізнуў па стропах»; удару не было, але ж фарба сцёрлася; усё ў поўным парадку, але ж можам і замяніць рэактар. Адзначым, што стаўка ў падобнай гульні словамі — жыцці і будучыня мільёнаў людзей у рэгіёне.

Калі гаворка ідзе пра надзейнасць і гарантыі бяспекі АЭС, прадстаўнікі карпарацыі на словах абяцаюць неверагодна высокія стандарты якасці і небывалы ўзровень кантролю і бяспекі. Так, апісваючы патрабаванні да якасці рэактара ВВЭР-1200, гаворыцца: «Рэактар з унутрыкорпуснымі прыладамі ў сабраным выглядзе на АЭС не перавозяць. Выраб складаецца з асобных частак, іх можна пашкодзіць пры перавозцы, а кожная, нават мікрадрапіна на корпусе атамнага гіганта, — брак».

Але ж калі справа даходзіць да рэалізацыі падобных гучных абяццанняў, то высвятляецца, што «Расатам» не збіраецца выконваць іх без дадатковых умоў.

Першы намеснік генеральнага дырэктара карпарацыі «Расатам» Аляксандр Лакшын заяўляе: «Мы абсалютна ўпэўненыя, што тэхнічных перашкод для выкарыстання корпуса не існуе».

Брак дэталі значыць адназначную забарону на яе далейшае выкарыстанне. Калі сцёртая фарба ад металічных строп на корпусе рэактара не з’яўляецца мікрадрапінамі, то што тады гэта такое?

У Дэкларацыі аб вытворчай сістэме «Расатама» за подпісам генеральнага дырэктара Сяргея Кірыленкі ёсць пункт №3: «Убудоўвай якасць у працэс. Не прымай брак, не стварай брак, не перадавай брак».

Першы намеснік генеральнага дырэктара карпарацыі Аляксандр Лакшын дадае: «Дапускаем, што замоўца можа прыняць рашэнне не выкарыстоўваць гэты корпус, каб пагасіць хвалю чутак і ажыятаж сярод часткі насельніцтва». Фактычна адказнасць перакладваецца на замоўцу, а дэкларуемый узровень 100%-най якасці і гарантыі адсутнасці дэфектаў забываецца. Калі замоўца не супраць, то можам і паставіць, а тое, што з’яўляецца вытворчым бракам, перастае ім быць, калі пакідае вытворчую пляцоўку. Атрымоўваецца, што гэта чарговая дэкларацыя, якая не вартая той паперы, на якой надрукавана.

Атрымоўваецца адно з двух: альбо інфармацыйныя матэрыялы «Расатама» ўтрымліваюць недакладную інфармацыю, альбо не адпавядаюць рэчаіснасці словы першага намесніка старшыні карпарацыі. Але ж у абодвух выпадках крыніцай гэтых недакладнасцяў, ці, іншымі словамі, хлусні, з’яўляецца сам «Расатам».

Усё узгаданае вышэй сведчыць пра наўмысны характар спроб схаваць ад беларускага боку інфармацыю аб стане рэактара і працэсе будаўніцтва.

Пасля таго, што здарылася, і далей давяраць словам і абяцанням карпарацыі «Расатам» было б злачыннай нядбайнасцю.

Прамым наступствам утойвання інфармацыі і спроб увесці ў зман з'яўляецца страта даверу да расійскай дзяржаўнай карпарацыі «Расатам».

Беларуская партыя «Зялёныя» лічыць немагчымым далейшае выкананне ўзятых на сябе абавязкаў карпарацыяй, бо яе наўмысныя дзеянні беззваротна падарвалі давер да яе як да партнёра.

Будаўніцтва Беларускай АЭС мусіць быць неадкладна і без усялякіх дадатковых умоў спынена. АЭС танней не дабудаваць сёння, чым ліквідаваць катастрафічныя наступствы заўтра.

Корпус бракаванага рэактару неабходна здаць на металалом. Па коштах «БелДругМета» за 330 тон несартыраванага лому чорнага металу магчыма атрымаць амаль 40 000 дэнамінаваных рублёў.

ІНШЫЯ НАВІНЫ РУБРЫКІ

Падзяліцца: 08.08.2016

Перадрук матэрыялаў магчымы пры абавязковай наяўнасці зваротнай і актыўнай гіперспасылкі.