Беларусь вызначылася з Нацстратэгіяй па абыходжанню з камунальнымі адходамі

У Беларусі пастановай Савета Міністраў №567 ад 28 ліпеня зацверджана Нацыянальная стратэгія па абыходжанні з цвёрдымі камунальнымі адходамі і другаснымі матэрыяльнымі рэсурсамі на перыяд да 2035 года. Пастанова ўступіць у сілу пасля афіцыйнага публікавання. А пакуль карэспандэнт Зялёнага партала даведаўся ў экспертаў як яны ацэньваюць стратэгію па адходам.

02.08.2017 Грамадства Аўтар: Хрысціна Чарняўская Фота: Хрысціна Чарняўская, pixabay.com, livejournal, earth911.com

 

Асноўныя палажэнні стратэгіі распрацаваны на аснове аналіза досведу Беларусі па ўдасканаленню сістэмы абыходжання з цвёрдымі камунальнымі адходамі і другаснымі матэрыяльнымі рэсурсамі з 1992 па 2015 год, а таксама міжнароднага досведу, паведамляе БЕЛТА.

 

''Сам факт з'яўлення такога кшталту стратэгіі мы ўхваляем, – адзначае Яўген Лабанаў з Цэнтра экалагічных рашэнняў. – Бо адсутнасць падобнага дакумента да сённяшняга дня спрыяла развіццю розных падходаў да абыходжання з адходамі ў розных гарадах. Цяпер жа з'явілася больш разумення, з улікам пяці асноўных накірункаў, пра якія ідзе гаворка ў стратэгіі''.

Адным з такіх накірункаў з'яўляецца развіццё раздзельнага збора смецця. Нягледзячы на тое, што за апошнія гады Беларусь мае пэўныя станоўчыя зрухі ў гэтай галіне, эксперт адзначае неабходнасць дапрацовак, каб сістэма сапраўды працавала добра. Так, на думку Яўгена Лабанава, не зашкодзіць уніфікацыя кантэйнераў для збора адходаў, удасканаленне лагістыкі. Пэўныя намаганні варта прыкласці і ў галіне перапрацоўкі, бо пакуль далёка не ўсё ў нашай краіне можна перапрацаваць. І асаблівую ўвагу трэба звярнуць на працу з насельніцтвам.

 

Згодна дадзеным стратэгіі, дыяпазон утварэння цвёрдых камунальных адходаў (ЦКА) на душу насельніцтва будзе знаходзіцца ў межах 320-380 кг з улікам росту ВВП. Штогод аб'ём утварэння ЦКА ацэньваецца ад 3,5 да 4 мільёнаў тон. А магчымае эканамічнае абгрунтаванне па зборы другасных матэрыяльных рэсурсаў складае ля 25%, з якіх 15,6% ўжо збіраецца.

 

Ухваляе эксперт намер увесці дэпазітную сістэму, якая зможа паспрыяць паляпшэнню раздзельнага збору і змяншэнню колькасці адходаў, якія патрапляюць у кантэйнеры для бытавога смецця праз закладны кошт.

''Калі разглядаць бягучую сітуацыю па Мінску, то самым эфектыўным метадам па зборы другасных матэрыяльных рэсурсаў, з улікам іх чысціні і колькасці, – з'яўляюцца прыёмныя пункты'', – кажа Яўген Лабанаў.

Такім чынам пры рэалізацыі дэпазітнай сістэмы, як яна закладзена ў стратэгіі, можна будзе разлічваць на дадатковыя 10-15% збора другасных рэсурсаў праз нарыхтоўчую сістэму прыёмных пунктаў.

Аднак ёсць у дакуменце моманты, якія непакояць экспертаў, напрыклад, будаўніцтва завода па спальванню смецця. Як адзначыў Яўген Лабанаў, яго з'яўленне ў пэўнай ступені супярэчыць мэтам развіцця раздзельнага збора.

''Дзеля эфектыўнага функцыянавання завода неабходнабудзе спальваць дастаткова вялікую колькасць другасных рэсурсаў – пластыка і паперы. Бо пры спальванні ''хвастоў', неперапрацоўваемых адходаў, вялікага эфекта не будзе. Вядома, мы зараз маем шмат пластыка, які не перапрацоўваецца, але частка яго можа быць небяспечнай і шкоднай для спальвання. Таму тут хутчэй пытанні метадалагічнага плана, калі развіццё сістэмы збора накіравана яшчэ на павелічэнне долі перапрацоўваемых адходаў'', – зазначае ён.

Пакуль не вядзецца гаворкі пра тое, што завод пачнуць будаваць ужо заўтра. Па такім прадпрыемстве існуе даволі шмат экалагічных і тэхналагічных пытанняў, якія не варта абмяркоўваць без дакладных планаў, вытворцаў і інвестараў.

''Беларусь далёка не першая краіна, якая сутыкаецца з праблемай адходаў. І мы бачым, што раздзельны збор, акрамя таго, што дае больш рабочых месцаў, з'яўляецца больш устойлівым, дазваляючы пазбегнуць праблем накаплення адходаў на палігонах у выпадку няспраўнасцяў на прадпрыемстве ў будучым'', – абгрунтоўвае Яўген Лабанаў сваю пазіцыю ў дачыненні да найлепшага спосаба абыходжання з адходамі.

Аднак, бадай, самым прыярытэтным накірункам, які закранула стратэгія, – прадухіленне ўтварэння адходаў.

''Няхай у дакуменце няма дакладных інструментаў па гэтаму накірунку, але стратэгія мяркуе распрацоўку дадатковага 'плана'. І на наш погляд, гэтаму павінна ўдзяляцца асаблівая ўвага, бо па выніку ні раздзельны збор, ні завод па спальванню не ў стане вырашыць праблему з адходамі цалкам. Асабліва ва ўмовах пастаяннага павелічэння ''аднаразавага'' смецця'', – падкрэслівае эксперт.

ІНШЫЯ НАВІНЫ РУБРЫКІ

Падзяліцца: 02.08.2017

Перадрук матэрыялаў магчымы пры абавязковай наяўнасці зваротнай і актыўнай гіперспасылкі.