З улікам вялікай колькасці негатыўных і нават абразлівых водгукаў, якія паступілі ў адрас арганізатараў з-за таго, што не ўсе жадаючыя сталі ўладальнікамі маладых дрэўцаў, на гэты раз актывісты падрыхтавалі большую колькасць саджанцаў, якія можна будзе абмяняць на макулатуру.
«Так, не ўсім у мінулы раз хапіла кедраў. Актывісты стараліся справіць сітуацыю, раздаючы прарошчаныя жалуды і іншае. Але людзі, на жаль, не зразумелі, што перш за ўсё падобныя акцыі носяць выключна сімвалічны характар і накіраваны на выпрацаўку добрай звычкі — збору і ўтылізацыі другасных матэрыяльных рэсурсаў. Маўляў, ты аддаеш папяровыя адходы на перапрацоўку і тым самым ратуеш дрэва», – патлумачылі ў Таварыстве «Зялёная сетка».
Арганізатары зазначаюць, што і на гэты раз няма ніякай гарантыі, што ўсім хопіць саджанцаў. Пакуль атрымалася знайсці максімальна магчымую колькасць дрэўцаў:
- 550 кедраў;
- 100 піхт;
- 30 лістоўніц;
- 10 маньчжурскіх арэхаў;
- 10 клёнаў.
І актывісты спяшаюцца нагадаць пра ўмовы акцыі:
«Той, хто прынясе ад 5 кілаграм макулатуры, зможа атрымаць саджанец. Пры гэтым не іграе ролі, якая ў цэлым у вас вага другаснага рэсурсу і колькі чалавек прынесла пакунак. Мы будзем даваць адно дрэўца ў адны рукі! На жаль, нам даводзіцца ісці на такія меры, каб хапіла саджанцаў максімальнай колькасці жадаючых».
На мінулай акцыі ўдалося сабраць 6 тон макулатуры, а за атрыманыя сродкі са здачы яе перапрацоўшчыку азеляніць мінскі сквер «Котаўка».
Дарэчы, вакол саміх кедраў таксама ўзнікла нямала спрэчак. Каб зразумець, наколькі ўсё ж яны могуць пашкодзіць біяразнастайнасці нашай краіны, Зялёны партал звярнуўся па каментар у Інстытут эксперыментальнай батанікі імя В.Ф. Купрэвіча пры Нацыянальнай акадэміі навук.
«Кедр — не вельмі марозаўстойлівае дрэва, вытрымлівае да мінус 10-15 градусаў і ў нашых шыротах можа загінуць. Але найчасцей тое, што саджаецца ў Беларусі, памылкова прымаецца за кедровае дрэва, на самой справе гэта сібірская кедровая сасна, якая якраз нядрэнна ў нас прыжываецца. Аднак гэтыя дрэвы не могуць выцясняць нейкі беларускі від, бо кедр і сасна кедровая не даюць самасеву», — зазаначае навуковы супрацоўнік інстытута Зміцер Дубовік.
Відавочна, тут варта разглядаць кедр у якасці інтрадуцэнта, а не інвазіўнага віду.
Інтрадуцэнт – (чужародны від) неўласцівы для дадзенай тэрыторыі, намерана ці выпадкова ўвезены на новае месца ў выніку чалавечай дзейнасці. Працэс засваення інтрадуцыраванага віду – адаптацыя да новых экалагічных умоваў – называецца аккліматызацыяй. Здараецца, што інтрадуцэнт здольны істотна змяніць экасістэму рэгіёна і стаць прычынай скарачэння ці нават вымірання асобных відаў флоры і фаўны. Такая інтрадукцыя лічыцца біялагічным забруджваннем.
Інвазіўны – біялагічны від, які распаўсюдзіўся ў выніку дзейнасці чалавека і пагражае біяразнастайнасці пэўнага рэгіёна. Першапачатковай прычынай распаўсюджання з'яўляецца намераная ці выпадковая інтрадукцыя арганізмаў за межы месц іх натуральнага існавання.
У вызначэнне інвазіўных відаў раслін нярэдка ўваходзіць ацэнка шкоды з эканамічнага пункту гледжання. Аднак існуюць нейтральныя і нават карысныя віды, якія прынята называць «мяккімі», якія наносяць нязначныя страты асяроддзю і эканоміцы.
Таму, калі ў вас ёсць крыху макулатуры і жаданне атрымаць дрэўца альбо проста ад душы зрабіць добрую справу, актывісты кампаніі «Гарадскі Ляснічы» чакаюць вас у дворыку за Галерэяй «Ў» 25 мая з 16.00.
ЧЫТАЙЦЕ ТАКСАМА:
Кнігі — не смецце: як ініцыятыва па збору макулатуры стала ў Мінску незвычайным буккросінгам