03.08.2015 / 03:08

Турысты з захапленнем адгукаюцца пра беларускую сталіцу, як пра чысты і зялёны горад, аднак самі гараджане адчуваюць, што Мінск становіцца для іх чужым і няўтульным з-за масавай забудовы зялёных зон. Яна псуе знешні выгляд мегаполіса і яго экалагічны стан. Найбольш яскравым прыкладам з’яўляюцца гатэлі, жылыя шматпавярхоўкі ўздоўж водна-зялёнага дыяметру. У межах кампаніі па яго захаванню Зялёны партал працягвае знаёміць сваіх чытачоў з пунктам гледжання адметных асоб, чаму ні ў якім разе нельга страціць гэтую ўнікальную прыродную тэрыторыю Мінска.

«Водна-зялёны дыяметр — гэта адметная і, бадай, найлепшая рэч нашага горада. Але, на жаль, пра яго, хутчэй за ўсё, давядзецца казаць ужо ў мінулым часе: ня «мае» значэнне для Мінска, а «меў», бо грошы ня пахнуць. З дыяметру выводзяцца ўсё новыя і новыя тэрыторыі, будуюцца арэны, гандлёвыя цэнтры, жылыя гмахі, і нікому ўжо няма справы да колішняй «візітоўкі» беларускай сталіцы. Дзіўна, што праектаваннем будынкаў займаюцца людзі, якія болей за нас з вамі ведаюць пра яго неацэнную каштоўнасьць. Атрымалася, што не паспелі скончыць, а ўжо спляжылі», — выказаўся музыка і мастак Лявон Вольскі.

Па яго меркаванню, разам са «знікненнем» водна-зялёнага дыяметру горад згубіць шмат у маральным сэнсе.

«Калі глядзіш на тое, як нішчаць на рэдкасць добрую задуму, спачатку апаноўвае злосць, потым сум, а праз нейкі час абыякавасць. Абыякавасць да гэтага горада. І ён робіцца не тваім, хаця ты тут нарадзіўся і вельмі яго любіў. І потым для маладых дойлідаў архітэктурныя злачынствы кшталту «дома Чыжа» ці гатэля «Кемпіньскі», які ўжо і не «Кемпіньскі», а немаведама што, становяцца пэўным прыкладам: ня варта азірацца на былыя «прыўкрасныя ідэі», варта проста зарабляць грошы. Я цягам апошніх дзесяці гадоў назіраю, як з утульнага невысокага Мінска робяць хаатычна забудаваную Маскву», — дадае музыка.

Выйсце з сітуацыі Лявон бачыць у больш радыкальных дзеяннях, напрыклад, праз народнае абурэнне, масавы выхад людзей на вуліцы. Толькі такім чынам можна спыніць злачынства, якое непахісна чыняць чыноўнікі. Што ж датычыцца спраўлення ўжо нанесенай шкоды, то тут патрэбна вярнуцца да першапачатковай задумкі і дэмантаваць усе аб'екты, якія парушаюць горадабудаўнічую канцэпцыю.

Да ўлюбёных месц наш візаві прылічвае Купалаўскі сквер, Лошыцкі парк і Камсамольскае возера.

«Шмат чаго звязана з рознымі водна-зялёнымі месцамі. Напрыклад, у Лошыцы я калісьці даўным-даўно доўгімі зімовымі вечарамі шпацыраваў са сваёй першай дзяўчынай, на Камсамольскім возеры мы рабілі пікнікі з маім першым гуртом «Мроя», а ў Купалаўскім скверы адбываўся першы рок-канцэрт пасля абвяшчэння незалежнасці “Беларускі рок вітае незалежнасць”», — узгадвае Лявон.

 

 

ЧЫТАЙЦЕ ТАКСАМА:

Архитектор Александр Акентьев: «Минск — город-вампир с невысоким запасом экологической прочности»

Архитектор Павел Нищенко: «Водно-зелёный диаметр Минска становится трендом»

Музыкант Павел Тараймович о водно-зелёном диаметре: «Важно соблюсти баланс между природой и сервисом»

Юрыст Рыгор Фёдараў: «Водна-зялёны дыяметр дапамагае захоўваць здароўе мінчан, а значыць, мае канкрэтны эканамічны эфект»

«Колас і Купала жылі цераз рэчку» — Глеб Лабадзенка аб таямніцах водна-зялёнага дыяметру

Піт Паўлаў: «Я сапраўдны фан гэтай воднай сістэмы!»

«У дзяцінстве на водна-зялёным дыяметры мы купаліся і лавілі рыбу…» Успаміны зоркі беларускага року

Антон Мотолько: «Водно-зелёный диаметр — место, где можно отдохнуть не среди бетона, стекла и асфальта»

Святлана Калінкіна: «Жаданне інвестараў будавацца ў цэнтры — гэта дурны густ і карупцыя»

Скульптор Павел Войницкий: «Водно-зелёный диаметр Минска — настоящее высокое искусство, но перед коммерческой застройкой он не устоит»

Людмила Кравчук: «Будет непростительной ошибкой уничтожить водно-зелёный диаметр ради пары развлекательных комплексов»

Сяргей Харэўскі: «Водна-зялёны дыяметр — гэта галоўная «вуліца» Мінска, яго сімвал!»

Урбаніст Дзмітры Бібікаў: «Мінск губляе самы характэрны і цікавы аб'ект усяго горада — водна-зялёны дыяметр»

В Минске стартовала кампания по спасению водно-зелёного диаметра

Автор:
Фотограф:
urban.by
Листайте дальше, чтобы прочитать следующую новость