Больш за 10 гадоў асноўныя мерапрыемствы летніку адбываліся ў вёсцы Залессе і на балоце «Дзікае». З мінулага году мы плануем штогод мяняць месцы правядзення летніку. Гэтай вясной нас чакае ТВП/ТОПЗ/Рамсарскае ўгоддзе «Палеская даліна ракі Буг», што знаходзіцца ў Брэсцкім раёне. Палеская даліна ракі Буг – гэта фрагмент даліны ракі Буг на поўдзень ад Брэста, да граніцы з Украінай, пэўна вядомы ўсім бёдуотчарам Беларусі рыбгас «Страдзеч», а таксама частка ляснога массіву на поўдзень ад Брэста. Тэррыторый мае важнае значэнне ў першую чаргу для захавання лясных і водна-балотных птушак. Больш пра «Палескую даліну ракі Буг» тут.
Гэтым разам мерапрыемства пачнецца 31 сакавіка і працягнецца да 2 красавіка ўключна. На працягу трох дзён мы будзем даследваць лясы і балоты, аднаўляць і будаваць гнёзды для звяроў і птушак, маркіраваць турыстычныя шляхі і канешне назіраць за птушкамі. Падчас летніку мы даведаемся, што адбылося з гнездавымі скрынямі і гнёздамі, пабудаванымі тут у мінулым годзе. Ці выконвае свае абавязкі па ахове рэдкіх відаў і біятопаў Брэсцкі лясгас? Якія пагрозы актуальны для ТВП і ях іх можна вырашыць? Ці сапраўды лясная сэртыфікацыя FSC дапамагае ахоўваць прыроду? Калі пачынаецца батанічны палявы сезон на Брэшчыне і ці можна знайсці ахоўваемыя расліны ў сакавіку? Адказы на гэтыя пытанні і шмат іншага — хутка!
Сёлета галоўная тэма летніку, акрамя савінай, гэта вынікі практычнай дзейнасці захавальнікаў прыроды. Летнік пройдзе ў форме практычнага семінара-трэнінга «Хто, калі не мы?».
Што чакае ўдзельнікаў?
- шпацыр па начных лясах (улікі соў);
- выправы ўдзень па навакольных лясах – маніторынг месцаў гнездавання/росту ахоўваемых відаў;
- выраб і развешванне штучных гнездавых скрынь для звяроў і птушак;
- праверка і аднаўленне раней развешаных гнездавых скрынь для птушак і звяроў;
- цікавыя прэзентацыі і прыродазнаўчыя фільмы;
- трэнінг-практыкум па выкарыстанні магчымасцяў, якія надае лясная сэртыфікацыя па сістэме FSC;
- вечарыны ля вогнішча і шмат іншага!
Хто можа прыехаць на летнік?
На мерапрыемства запрашаюцца ўсе жадаючыя. У сувязі з абмежаванай колькасцю месцаў перавагу будуць мець заяўкі, атрыманыя першымі. Удзельнікі часткова аплочваюць удзел у мерапрыемствах летніка (праезд па мясцовасці, матэрыялы і абсталяванне і інш.). Пры сабе мець каля 15 бел. руб. за ўвесь час (3 дні). Размяшчэнне ўдзельнікаў плануецца ў цёплым драўляным доме.
Што абавязкова пакласці ў заплечнік?
- спальны мяшок
- дыванок
- гумовыя боты (пажадана высокія балотныя боты)
- ліхтарык
- асабісты посуд
- прысмакі :)
Як атрымаць месца ў летніку?
Дашліце анкету-заяўку на адрас: dzikiles@mail.ru, з копіяй: egreta113@mail.ru
Анкета ўдзельніка летніку «Начныя жыхары ляСОЎ-2017»:
- Прозвішча, імя, імя па бацьку.
- Узрост.
- Хатні адрас.
- Ці з’яўляецеся вы сябрам АПБ?
- У якіх мерапрыемствах АПБ вы ўдзельнічалі ў апошнія 3 гады?
- Ваш род заняткаў (студэнт, працую, вучань і г.д.)
- Колькі відаў птушак вы бачылі ў Беларусі?
- Што вам больш за ўсё падабаецца рабіць з прапанаванага ў праграме летніку?
- Чаму вы хочаце ўдзельнічаць у летніку?
- Нумар мабільнага тэлефону і электронны адрас для сувязі.
Заяўкі прымаюцца да 20 сакавіка ўключна!
Нагадваем: колькасць месцаў абмежаваная! Перавагу будуць мець тыя, чыя матывацыя будзе найлепшым чынам адлюстравана ў заяўцы.
Поспехаў і да сустрэчы!