"Мы займаемся падрыхтоўчай працай, афармленнем дакументаў, падрыхтоўкай біяэканамічнага абгрунтавання", — заявіў Рубашчанка.
Паводле яго слоў, запаведнік хоча арганізаваць на сваёй тэрыторыі трафейнае паляванне, калі паляўнічыя плацяць вялікія грошы за магчымасць знішчыць пэўную жывёлу, напрыклад буйнога і дарослага самца. Прыбыткі ад ліцэнзій на такое паляванне звычайна трацяцца на ўзнаўленне папуляцый жывёл.
"Ёсць від дзейнасці як трафейнае паляванне. Не ўсе віды палявання, а трафейнае. Гэта паляванне, пры якім адбіраюцца самыя дарослыя, высокія па сваіх якасцях самцы. Трафейнае паляванне аленя і лася цэніцца па колькасці адросткаў на рогах і вазе рогаў", — патлумачыў Рубашчанка журналістам.
Паводле яго слоў, цяпер на тэрыторыі запаведніка жывуць каля 2 тысяч ласёў, крыху больш за 2 тысяч высакародных аленяў, а таксама казулі. Зараз запаведнік рыхтуе дакументацыю на дазвол такога палявання, на думку дырэктара, дакументацыя можа быць гатовая ўжо ў канцы гэтага года.
Па словах дырэктара, мяркуецца, што пасля завяршэння палявання тушы жывёл будуць праходзіць дазіметрычны кантроль, пасля якога будзе ясна, ці можна ўжываць іх у ежу.
"У прынцыпе яны павінны забіраць і тушу, і рогі, але ніхто ім не аддасць, калі звер будзе перавышаць дапушчальныя нормы", — растлумачыў Рубашчанка.
Палескі дзяржаўны радыяцыйна-экалагічны запаведнік быў арганізаваны ў 1988 годзе ў беларускай частцы зоны адчужэння Чарнобыльскай АЭС на тэрыторыі трох найбольш пацярпелых ад аварыі раёнаў Гомельскай вобласці. Плошча запаведніка — 216 тысяч гектараў, на яго тэрыторыі знаходзіцца каля 100 эвакуяваных вёсак, дзе да аварыі жыло звыш 20 тысяч чалавек.
Зараз у запаведніку дазволены арганізаваны турызм — госці могуць не толькі пазнаёміцца з працай вучоных, але і паназіраць за дзікай прыродай, у тым ліку за многімі відамі птушак. Узімку турысты могуць убачыць зуброў, якія выходзяць да кармушак.