Перейти к основному содержанию
06.02.2017 / 16:02

На «Зялёны тэлефон» Экалагічнага таварыства «Зялёная сетка» паступіла інфармацыя: у цэнтры старажытнага Полацка з’явіўся вялікі сметнік, да якога нікому няма справы. Карэспандэнт Віцебскага Зялёнага партала выправіўся на месца і спраўдзіў, што ўсё не так страшна.

Актывіст Зялёнай сеткі Юрый Бельскі распавёў нам перадгісторыю праблемы, пэўныя дэталі дапоўніў агляд навін па тэме за апошні час. Яшчэ некалькі год таму па вуліцы Ніжне-Пакроўскай мясцілася некалькі пляцовак з кантэйнерамі для смецця. У 2013 годзе пасля скарг мясцовых жыхароў колькасць пляцовак скарацілі. Засталася адна — непадалёку ад помніка 23-м гвардзейцам.

«Адна на дзве вялікіх вуліцы — Ніжне-Пакроўскую і праспект Францыска Скарыны! — абураліся ўжо іншыя мясцовыя жыхары. — Мала таго, што шмат каму хадзіць цяпер з гэтымі пакетамі ледзь не праз увесь цэнтр, дык яшчэ і смецця там увесь час горы!»

Менавіта тут знаходзілася кантэйнерная пляцоўка
Менавіта тут знаходзілася кантэйнерная пляцоўка

Дамы насупраць
Дамы насупраць

Прайшло колькі часу — спрэчную пляцоўку таксама прыбралі, затое з’явіліся кантэйнеры ў двары дома №39 па Ніжне-Пакроўскай. Але незадаволенымі цяпер засталіся жыхары гэтага і бліжэйшых дамоў. Пра гэта нават газета «Беларусь Сегодня» пісала.

«Сабакі і груганнё разносяць смецце па двару. Бамжы ночы напралёт корпаюцца, грукаюць. Спаць немагчыма!» — тлумачыла карэспандэнту «СБ» жыхарка Лідзія Бохан у жніўні мінулага года.

Двор побач
Двор побач

Намеснік старшыні Полацкага райвыканкама Аляксандр Міхалевіч адрэагаваў, што санітарныя нормы вытрымліваюцца: кантэйнеры знаходзяцца ў 20 метрах ад вокнаў жылых дамоў. Смецце, кажуць, вывозяць своечасова.

Мы пераканаліся ў гэтым: некалькі дзён запар штодня маніторылі сметнік, і пытанняў да яго стану амаль не ўзнікала. Праўда, эстэтыкі двару кантэйнеры ніяк не надаюць. Кідалася ў вочы раскіданае вакол смецце — балазе, няшмат. Ды й асобы без пэўнага месца жыхарства тут сапраўды нярэдкія госці...

«А якія тут пахі “цудоўныя”, калі цёпла — вы вось прыйдзіце і адчуйце!» — прапанавалі мясцовыя жыхары.

Сапраўды, нязручнасці ёсць. Але іншага выйсця няма: нягледзячы на абурэнне, карыстацца спрэчнымі кантэйнерамі людзі працягваюць. Можна, канешне, прапанаваць ім пайсці па прыкладзе японскага гарадка Камікацу

Але што ж рабіць тым, хто сутыкнуўся з падобнай праблемай, у беларускіх рэаліях? Карысныя парады ад актывісткі Зялёнай сеткі Алёны Дубовік:

— Для тых, каго непакояць экалагічныя праблемы і хто гатовы спрычыніцца да іх вырашэння, працуе «Зялёны тэлефон». Кожныя панядзелак, сераду і пятніцу ад 10-й да 18-й гадзіны можна звярнуцца па нумарах: +375(29)170-26-70 (velcom), +375(17)335-47-16 (гарадскі), альбо ў любы час па e-mail: greenphonehelp@gmail.com. Аператары дапамогуць вызначыць алгарытм вырашэння праблемы, могуць аказаць юрыдычную падтрымку, напрыклад, параяць, як слушна скласці зварот у выканкам ці іншыя органы.

У апісанай сітуацыі, сапраўды, цяжка дагадзіць усім: забудова досыць старая, месца, якое задаволіла б усіх, знайсці немагчыма — гэта паказаў час. Усталяваць пляцоўку і адрапартаваць, маўляў, усё гатова — не адзінае, што могуць зрабіць камунальнікі. Таксама, як і людзям недастаткова адно сказаць: «Нам не падабаецца!» Лепш сачыць за тым, каб смецце своечасова вывозілі, пільнавалі і прыбіралі пляцоўку, каб быў зладжаны раздзельны збор адходаў. Можна дабівацца таго, каб у горадзе была абсталявана пляцоўка для збору буйнога смецця, напрыклад будаўнічага; каб на кантэйнернай пляцоўцы быў дах — тады смецце не будзе заліваць дажджом ці снегам (адпаведна, запаволіцца працэс гніення і зменшыцца верагоднасць непрыемных пахаў).

Добра, каб кантэйнеры нейкім чынам зачыняліся: тады ў іх не змогуць трапіць хаця б бадзяжныя жывёлы, якія раскідваюць смецце па блізкай да пляцоўкі тэрыторыі. Каб гэта ўсё рэалізаваць, трэба сапраўды звяртацца ў адпаведныя ўстановы — і ў гэтым мы можам пракансультаваць.

 

 

 

Ёсць «Зялёны тэлефон»!

У вырашэнні падобных пытанняў плён можна прынесці шчыльнае ўзаемадзеянне камунальнікаў, аператараў па вывазу смецця і мясцовых жыхароў, пабудаванае не на канфрантацыі, а на дыялогу. Дарэчы, актывісты Зялёнай сеткі ўжо падрыхтавалі шэраг кейсаў па вырашэнні тых ці іншых пытанняў, датычных збору і вывазу смецця.

Автор:
Фотограф:
Ігар Палынскі
Листайте дальше, чтобы прочитать следующую новость