Адным з пашкоджаных аб'ектаў стаў прытулак для жывёл «Любячыя сэрцы» ў пасёлку гарадскога тыпу Вялікадалінскае ў прадмесці Адэсы. Паводле кіраўніцы прытулку Вольгі Шылімінай, па ім двойчы з інтэрвалам каля дзесяці хвілін ударылі дроны, што значна ўскладніла эвакуацыю жывёл.
Пасля першага ўдару загарэліся палі вакол прытулку. Другі выбух выклікаў пажар ужо на яго тэрыторыі. Агонь знішчыў будынкі, цёплыя рэчы, запасы корму, медыкаменты і абсталяванне для догляду жывёл.
«Я карміла жывёл увечары. Раптам перад вачыма ўспыхнула зарыва, выбуховая хваля адкінула мяне ў памяшканне. Потым я ўбачыла полымя. Я схапіла вогнетушыцель і пачала тушыць траву, каб агонь не дайшоў да вальераў. Тады адбыўся другі ўдар.
Мне ўдалося патушыць невялікі праход для жывёл і адамкнуць дзверы ў двор, дзе яны ўтрымліваліся. Я выцягвала іх за шыі. На іх выратаванне заставаліся лічаныя хвіліны», – расказала Вольга.
Падчас абстрэлу перапалоханыя жывёлы хаваліся ў пластыкавых будках, якія імгненна загарэліся. Калі на месца прыбылі ратавальнікі, яны спрабавалі вывесці Вольгу ў бяспечнае месца, але яна адмовілася пакінуць жывёл.
«Яны проста згарэлі б жыўцом. З неба ліўся вогненны вадаспад з расплаўленага пластыку. Я надзела медыцынскую маску, але яна не ратавала ад дыму», – расказала кіраўніца прытулку.
На момант атакі ў прытулку ўтрымліваліся 136 сабак і 48 катоў. Большасць жывёл удалося выратаваць, аднак тры сабакі і дзесяць катоў загінулі. Паводле Вольгі, пасля другога выбуху яна здолела вынесці яшчэ пяць катоў і аднаго сабаку, але да астатніх праз полымя ўжо было немагчыма дабрацца.
Цягам наступных прыкладна 90 хвілін паблізу прытулку прагучалі яшчэ чатыры выбухі. Пажар тушылі да самай раніцы.
Агонь таксама знішчыў запасы корму і памяшканне, у якім жыла кіраўніца прытулку. Цяпер «Любячым сэрцам» патрэбныя корм, медыкаменты, сродкі для догляду жывёл і дапамога ў аднаўленні.
Зоаваланцёры пачалі звязвацца з Вольгай Шылімінай, каб каардынаваць дапамогу.