Перейти к основному содержанию
04.04.2017 / 15:04

Вырашыць кватэрнае пытанне калі не для сябе, дык хоць для птушак можа кожны ахвотны. Тым больш што стаіць яно вельмі востра: у прыродзе вясна. Вынікам будзе магчымасць мець побач удзячнага працавітага суседа і аб’ект для назірання. А трэба для гэтага толькі крышку будаўнічага матэрыялу і жаданне. Як правільна будаваць гняздоўі, дзе і як іх размяшчаць, расказваў і паказваў вучням Лужкаўскай сярэдняй школы сябра грамадскай арганізацыі «Ахова птушак Бацькаўшчыны» Валерый Кавалёнак.

Школьнікі Шаркаўшчынскага раёна правялі  акцыю «Сустракаем птушак». Шпакоўні сябры клуба «Крылаты дазор» змайстравалі пад кіраўніцтвам настаўніка Анатоля Крыўкі.

А як і дзе іх лепш размясціць, паказаў сябра АПБ Валерый Кавалёнак. Яго вопыт дапамог выявіць памылкі, зробленыя дзецьмі пры будаўніцтве гняздоўяў.

Валерый растлумачыў галоўныя прынцыпы ў справе майстравання шпакоўняў і сінічнікаў. Асаблівую ўвагу ён прапанаваў звярнуць на памер лятка і гнездавой камеры. Для сініц будзе дастатковым дыяметр лятка ў 30-35 мм, а вось для шпакоў неабходна 50-60 мм. Выявілася таксама, што класічнае гняздоўе з лятком, блізкім да цэнтра, немэтазгоднае, бо такое размяшчэнне «ўваходных дзвярэй» памяншае памер гнездавой камеры.

Валерый расказаў аб уласным вопыце стварэння месцаў гнездавання для сініх сініц, соў, буслоў і іншых птушак, аб вынаходніцтвах у гэтай справе, падзяліўся сакрэтамі паспяховых рашэнняў пры выбары і пошуку аб’ектаў для фатаграфавання.

— Пры будаўніцтве гняздоўя трэба ўлічваць памер птушак і іх звычкі. Лепш за ўсё будаваць гняздоўе для канкрэтнага жыхара і там, дзе яго заўважылі, — расказвае Валерый. — Гэта дазволіць не толькі ўпэўніцца, што жыллё будзе заселена, але і дасць магчымасць паназіраць за цікавым аб’ектам.

Размяшчаць гняздоўі трэба на адлегласці не менш 20 метраў адно ад другога на вышыні 3-5 метраў ад зямлі. Лепш рабіць гэта на дрэвах (там птушкі адчуваюць сябе ў бяспецы), выкарыстоўваючы для замацавання ізаляваны дрот. Ляток пажадана накіраваць на поўдзень.

Валерый адзначыў, што самым удзячным і непатрабавальным суседам, па яго назіраннях, з’яўляецца сіняя сініца. Яна з гатоўнасцю займае нават металічныя трубы, калі ў іх зрабіць адтуліну ў якасці лятка.

Падчас сустрэчы Валерый Кавалёнак расказаў дзецям аб уласным вопыце ў назіранні за птушкамі, паказаў фотаздымкі.

На жаль, дажджлівае надвор’е не дазволіла давесці справу да канца ў той жа дзень. Але пазней усе 8 шпакоўняў, зробленых вучнямі 8 класа знайшлі сваё месца.

Сустрэчы з сябрам АПБ Валерыем Кавалёнкам і начальнікам інспекцыі па ахове прыродных рэсурсаў і навакольнага асяроддзя Іванам Міхалёнкам праходзяць у Лужкаўскай школе ўжо не першы раз. Іван Міхалёнак з гатоўнасцю адклікаецца на запрашэнне і праводзіць з дзецьмі жывую гутарку. Падчас сустрэчы вучні задавалі пытанні, якія іх хвалявалі. Гаварылі аб правілах рыбнай лоўлі, вясновых палах травы і смецця, зборы бярозавага соку.

Автор:
Фотограф:
Алёна Лапацкая
Листайте дальше, чтобы прочитать следующую новость