«Viva Ровар» для гараджан стаў сімвалам свабоды і «еўрапейскасці», паведамляе сайт onliner.by.
У суботу, 13 мая, кожны жадаючы мог праехацца на веласіпедзе па праспекце Пераможцаў ад парка Перамогі да «Мінск-Арэны» і назад, не турбуючыся пра тое, што будзе замінаць аўтамабілям ці гарадскому транспарту. Спецыяльна з нагоды правядзення параду рух любога аўтатранспарту на дадзеным участку праезднай часткі і некаторых прылягаючых вуліцах быў абмежаваны з 14.30 да 16.00.
І некаторыя веласіпедысты падыйшлі крэатыўна да ўдзелу ў парадзе, параўвасобіўшыся ў казачных і не толькі герояў.
«Вядома, не можа не радаваць такое відовішча..., — каментуе Зялёнаму парталу суботнюю падзею Павел Гарбуноў з Мінскага роварнага таварыства. — Хацелася б, каб яшчэ больш людзей прымалі ўдзел, прыязджалі ў нейкіх неверагодных вобразах, касцюмах, ператвараючы парад у сапраўдны карнавал і свята».
У цэлым, па словах Паўла, сёлятні велапарад працягвае традыцыю, застаючыся цёплым па сваёй атмасферы, пазітыўным і вясёлым па настроі ўдзельнікаў.
Хаця, на жаль, гэтым разам не абышлося без затрыманняў, пра што паведаміў сайт Наша ніва. Супрацоўнікі міліцыі затрымалі аднаго з удзельнікаў параду за нацыянальную сімволіку. Па словах праваабаронца, пра лёс хлопца пакуль інфармацыі ніякай няма.
