Толькі на адзін дзень у сценах Галерэі сучаснага мастацтва "Ў" аматары арту, элюзіі і перформансаў маглі пагрузіцца ў "Адносную вільготнасць". Так называецца выстава, што створана па выніках пленэра, які традыцыйна праходзіць у маляўнічым прыродным месцы — на Блакітных азёрах, на хутары Балдук.
У гэтым годзе тэмай была вада — яе станы, пераўвасабленні. Больш глыбока даследаваць гэту прыродную стыхію мастакам з Беларусі, Расіі і Італіі дапамаглі эколагі, стасункі з мясцовымі жыхарамі і актывістамі, разуменне лакальнага кантэсту асяроддзя і аналіз глабальных праблем.
Жывучы ў гарадах, маючы пастаянны і неабмежаваны доступ да вады, мы можам нават не задумвацца, што на планеце існуюць краіны, дзе пітная вада — раскоша.
Згодна з дадзенымі Сусветнай арганізацыі аховы здароўя і ЮНІСЕФ:
- 2,1 мільярды не забяспечаны бяспечным і даступным водазабеспячэннем па месцы жыхарства;
- 4,5 мільярды не маюць бяспечных сродкаў санітарыі;
- 361 тысяча дзяцей ва ўзросце да пяці год памірае ў год ад дыярэі праз забруджанне водных рэсурсаў.
Альбо не ўяўляем, як уплываем на водныя рэсурсы штодня праз звыклы лад жыцця.
Эколагі прызнаюць: стан многіх водных экасістэм змяніўся да непазнавальнасці. І прычын таму можа быць некалькі: вядзенне гаспадарчай дзейнасці чалавекам, у прыватнасці сельскагачпадарчай, празмерныя спажывецкія звычкі і скід адходаў, кліматычныя змяненні.
Гэта легла ў аснову аўдыё і візуальных твораў на выставе. Дзевяць мастакоў па-свойму прачулі вадкую субстанцыю: Ігар Корзун, Сяргей Гудзілін, Вольга Маслоўская, Анастасія Ганчарова, Bazinato, Ягор Войнаў, Давідэ Бевілакуа, Варвара Суднік.
Наведвальнікі маглі стаць прамымі ўдзельнікамі выставачнага працэсу. У самым канцы арганізатары прапанавалі прадэгуставаць ваду з розных крыніц і вызначыць для сябе найбольш "жывую", наталяючую смагу і іграючую на смакавых рэцэптарах.
