Калі экскурсія з удзелам экскурсавода, то плата за гадзіну вырастае. Рыбная лоўля, зразумела, аплачваецца, і значна даражэй. А калі на сваёй лодцы, то будзе яшчэ даражэй. Але людзі хочуць хадзіць па грыбы і ягады, купацца ў возеры бясплатна, улічваючы, што лясныя і водныя багацці агульнанародныя.
Таму вяскоўцы накіравалі зварот у Адміністрацыю прэзідэнта, пад якім падпісалася 70 чалавек. Кажа шматдзетны бацька з Целяхан Аляксандр Іваноў:
– Падрыхтаваны калектыўны зварот, да якога далучаны ўсе дакументы, звароты ў МУС і пракуратуру, адказ Белавежскай пушчы.
Вельмі хацелася б, каб стаўленне да людзей было чалавечым, законным, каб не парушаліся нашы правы. Будзем спадзявацца, што будзе нейкая рэакцыя. Мы чакаем, што пройдзе сход і нам, мясцовым жыхарам, дадуць адказ.
Паводле Аляксандра Іванова, нават такая невялікая аплата за лес і возера б’е па кішэні вяскоўцаў. Напрыклад, інтэрнацкія дзеці, якія ехалі з выхавацелем на возера, былі развернуты ля шлагбаума з-за немагчымасці заплаціць.
