Занятак па душы знайшоўся кожнаму. Фітнэс, танцы, ёга — са свежым паветрам у якасці бонуса. Працаваў буккросінг, handmade-кірмаш, фрымаркет. Карыстаючыся экалагічным падыходам, можна было падараваць старым рэчам другое жыццё. Новым для горада і цікавым для гараджан стаў лекторый на траве: куды вандраваць без візы, як сарціраваць смецце…
Дзяцей і дарослых захапілі хімічныя фокусы ад праекта «Наука вне себя». А малыя яшчэ і майстравалі кошыкі і сядзенні для ровараў з лазы, будавалі дамы з кардону, блукалі ў саламяным лабірынце.
Бацькі тым часам удзельнічалі ў конкурсах і майстар-класах па тэме веласіпеднага руху, мабільнасці і экалогіі ўвогуле. Самыя ўпэўненыя запрашаліся прыняць удзел у гонцы па перасечанай мясцовасці. І ўсё гэта — пад жывую музыку.
Вялікай папулярнасцю на пікніку карысталася саламяная мэбля аўтарства Наваполацкай асацыяцыі студэнтаў-архітэктараў — імправізаваныя пуфы спалучаюць бяспэчнасць для асяроддзя і ўтульнасць сенніка. У Полацку ўвогуле да моладзі прыслухоўваюцца. Так, у межах праекта «ГарСвятло» будучы выгляд горада стваралі тыя ж студэнты.
Арганізавалі Еўрапейскі тыдзень мабільнасці Полацкі раённы выканаўчы камітэт, фонд «Інтэракцыя», інжэнерна-будаўнічы факультет Полацкага дзяржаўнага ўніверсітэта і Наваполацкая асацыяцыя студэнтаў-будаўнікоў. Праект фінансуецца Еўрапейскім саюзам.
