Варвара Марозава

Агульная веладарожка для гарадоў-суседзяў Полацка і Наваполацка, арэнда ровараў і стварэнне экапрадпрыемстваў — такія планы агучылі арганізатары Еўрапейскага тыдня мабільнасці ў Полацку. Горад ужо ў другі раз далучыўся да міжнароднай акцыі ў межах праекта «Ад энергаэфектыўнасці да гарадской мабільнасці», а ў гэтым годзе пад дэвізам «Разумная мабильнасць. Моцная эканоміка».

На Тыдні мабільнасці для палачан зладзілі адно з самых маштабных мерапрыемстваў — гарадскі велапікнік. Ён адбыўся ў парку ля Кургана Бессмяротнасці па завяршэнні велапрабега паміж Полацкам і Наваполацкам. Свята атрымалася ў стылі «эка»: тут былі экамэбля, экаежа, экатранспарт, а галоўнае — экасвядомыя людзі.

Дзякуючы бясплатнай праграме «​Moovit» жыхары Полацка і Наваполацка змогуць хутчэй і зручней планаваць свае паездкі ў гарадскім транспарце. Праграма даступная для запампоўкі на Google Play, Windows Phone, ITunes, а таксама ў web-версіі.

Горад, які першым у Беларусі далучыўся да Пакту мэраў і правёў Еўрапейскі тыдзень мабільнасці, працягвае з энтузіязмам падтрымліваць новыя ідэі. Зараз Полацк далучыўся да ініцыятывы ў галіне чыстай і ўстойлівай гарадской мабільнасці «CIVITAS Forum Network».