Новы цэнтр стане працягам развіцця тэрапіі з удзелам жывёл ва Украіне. Яго стварэнне грунтуецца на паспяховым досведце цэнтраў каністэрапіі, якія з 2023 года ўжо дапамаглі больш як 8 000 чалавек. Штомесяц прастора зможа прымаць больш за 100 наведвальнікаў.
Ён будзе адкрыты для ўсіх ахвотных: дзяцей, дарослых, ветэранаў і людзей з інваліднасцю. Працу з наведвальнікамі будуць суправаджаць прафесійныя псіхолагі, а самі заняткі будуць праходзіць у спецыяльна абсталяванай прасторы з улікам дабрабыту жывёл і камфорту людзей.
Фелінатэрапія – адзін з напрамкаў тэрапіі з удзелам жывёл, які дапамагае людзям спраўляцца са стрэсам, трывожнасцю і эмацыйным знясіленнем. Навуковыя даследаванні сведчаць, што ўзаемадзеянне з жывёламі можа станоўча ўплываць на эмацыйны стан чалавека і спрыяць аднаўленню пасля складаных жыццёвых выпрабаванняў.
Асаблівасцю праекта стане тое, што да праграм фелінатэрапіі будуць залучацца жывёлы, выратаваныя з прыфрантавых тэрыторый і рэгіёнаў, якія пацярпелі ад баявых дзеянняў. Аднак абяруць толькі тых жывёл, якія камфортна адчуваюць сябе ў кампаніі людзей і самі імкнуцца да такога ўзаемадзеяння.
Праект рэалізуе грамадская арганізацыя "Бородата Котомамуля" пры падтрымцы Royal Canin Foundation. Ініцыятар праекта – Аляксей Сураўцаў з сябрамі арганізацыі з пачатку вайны ратуюць жывёл з гарачых кропак. "Зялёны партал" пісаў пра гэта раней. Зараз завяршаецца будаўніцтва цэнтра, якое будзе працягвацца цягам 2026 года, а адкрыццё для першых наведвальнікаў запланавана на 2027 год.
Дарэчы, Royal Canin Foundation ужо рэалізаваў ва Украіне два праекты: фонд стварыў цэнтры тэрапіі з выкарыстаннем сабак і запачаткаваў навучанне пошукавых сабак для выратавання людзей з-пад завалаў. Усяго гэтая дабрачынная арганізацыя рэалізавала 20 праектаў у 15 краінах свету. "У Royal Canin усё, што мы робім, грунтуецца на перакананні, што паляпшэнне жыцця хатніх гадаванцаў можа істотна паўплываць на жыццё людзей," – адзначае Віталія Пісарава, генеральная дырэктарка Royal Canin Ukraine.
Паводле даных Усеўкраінскай праграмы ментальнага здароўя "Ти як?" 71% украінцаў паведамляюць пра патрэбу ў эмацыйнай або псіхалагічнай падтрымцы. Менавіта таму каманда праекта разглядае цэнтр не толькі як прастору дапамогі, але і як будучы экспертны асяродак развіцця фелінатэрапіі ва Украіне.
"Наша місія сягае значна далей, чым проста адкрыццё прасторы. Яна пра ацаленне разбітых душ праз безумоўную любоў. Гэты цэнтр стане прытулкам, дзе людзі, якія страцілі спакой і адчуванне бяспекі, змогуць зноў знайсці іх у ціхім муркатанні ката. Мы хочам паказаць, наколькі магутнай і гаючай можа быць сувязь паміж людзьмі і выратаванымі жывёлкамі. Гэты толькі пачатак – пілотны праект, які, мы спадзяемся, дасць штуршок агульнанацыянальнаму руху, прыносячы суцяшэнне і эмацыйнае аднаўленне ў кожны куток Украіны", – пракаментаваў Аляксей Сураўцаў.