«Сан-Францыска — горад, у якім налічваецца больш за 1000 муралаў. Шмат з іх адлюстроўваюць шматлікія нацыянальнасці жыхароў горада. Але беларускага мурала дагэтуль не было. Таму беларусы, якія жывуць у Сан-Францыска/Бэй Эрыі, з дапамогай сяброў з іншых краінаў, вырашылі гэта выправіць і ўпрыгожыць горад беларускім муралам!» — паведамляюць у допісе.
Мурал зроблены цягам двух тыдняў з дапамогай 50 валанцёраў ва ўзросце ад 8 да 70 гадоў.
«У апошні дзень маляваць прыйшло больш за 30 чалавек, атрымалася сапраўдная талака», — дзеліцца дэталямі аўтар допісу.
Аўтарка мурала — 15-гадовая беларуска Саша Герман. На мурале адлюстраваны традыцыйныя матывы — дзяўчаты ў народных строях, Купальскае вогнішча, зубр, беларускія арнаменты.
Збор сродкаў на мурал дапамагла арганізаваць Асацыяцыя беларусаў Амерыкі. Лішак грошай абяцаюць пералічыць праекту Dissidentby, які падтрымлівае палітзняволеных і іх сем’і.