Арганізатары прыцягнулі ўвагу гарадзенцаў выступам саксафаніста з Мінска Антона Грыневіча і перадусім арт-інсталяцыяй скульптараў Улада Лісіна і Яўгена Вінакурава.
Мастакі зрабілі фігуру сабакі ў поўны рост пад назвай «Сабака Баскервiлька», у яе стварэнні былі спалучаныя тры віды мастацтва: скульптура, фатаграфія і жывапіс. Для яе стварэння выкарыстоўваліся як фатаграфіі жывёл з пункта часовага ўтрымання «Спецаўтагаспадаркі», так і фатаграфіі хатніх жывёл. Такім чынам аўтары хацелі прадэманстраваць, што ў жыцці ўсе жывёлы аднолькава прыгожыя, і толькі самі людзі штучна іх падзяляюць.
Побач былі расстаўленыя каркасы яшчэ пяці скульптур сабак, якія размалёўвалі гродзенцы. Саміх жа гродзенцаў адмысловыя спецыялісты аквагрыму Алена Мацюк і Наталля Літвінава размалёўвалі пад котак, сабак і іншых жывёл.
Як адзначылі арганізатары, на акцыі сабралі практычна двухмесячны рацыён кармоў і прадуктаў для жывёл. Напрыклад, велізарны пакунак харчоў прынесла настаўніца з гімназіі № 6 разам з вучнямі, вельмі дапамагла сетка крамаў «Заасфера».
Акцыя будзе знаходзіцца ў гандлёвым цэнтры да 23 красавіка і кожны наведвальнік можа падтрымаць жывёл. Усе сабраныя рэчы будуць перададзеныя ў пункт часовага утрымання бадзялых жывёл пры «Спецаўтагаспадарцы».
