Заапарк у Познані два гады таму дапамог тыграм, якіх прывезлі кантрабандай на беларуска-польскую мяжу.
Сёлета ўстанова таксама не засталася ўбаку ад лёсаў дзікіх жывёл, арганізуе іх эвакуяцыю з Украіны, шукае новыя дамы звярам па заапарках усёй Еўропы.
26 лютага заапарк у Познані абвясціў збор сродкаў для дапамогі кіеўскаму заапарку. Ад свайго імя разам з партнёрамі- міжнароднымі арганізацыямі Stichting AAP, Natuurhulpcentrum Opglabbeek і Save Wild Fund супрацоўнікі паведамілі: «Мы выступаем за львоў, тыграў і іншых звяроў, якіх ратуем з Кіева. Просім трымаць кулачкі за іх бяспечную дарогу».
У мэтах бяспекі звяроў падрабязнасці, калі іх вывозілі, не раскрываліся.
27 лютага супрацоўнікі познаньскага заапарка былі ўжо на польска-украінскай мяжы, чакаючы жывёл з поўнай машынай кармоў і лекаў, сабраных ахвярадаўцамі ці набытых за ахвяраваныя грошы.
28 лютага увечары стала вядома, што транспарт са звярамі акружылі расійскія танкі.
1 сакавіка абаронцы Кіева суправадзілі транспарт праз лінію фронту.
2 сакавіка познаньцы паведамілі, што жывёлы «едуць па Украіне, пазбягаючы зон інтэнсіўных бамбёжак і абстрэлаў».
Уначы звяры і іх суправаджальнікі правялі ў чарзе на мяжы, на марозе, 8 гадзін. Непасрэдна афармленне заняло зусім няшмат часу.
3 сакавіка звяры нарэшце трапілі ў Познань.
«Ехалі ў вялікім стрэсе, пад бамбардзіроўкамі і абстрэламі. Усе выжылі, гэта цуд! – кажа дырэктарка познаньскага заапарка Эва Зграбчыньска. – Шэсць львоў, шэсць тыграў, лікаон і два каракалы цудам перажылі транспарціроўку праз зону вайну і агонь».
Паведамляецца, што дарога заняла больш за двое содняў.
4 сакавіка намеснік мэра Познані выдаў афіцыйны дазвол на тое, каб уратаваныя жывёлы пакуль пажылі ў гарадскім заапарку. Стала вядома таксама, што з Адэсы у бок польскай мяжы выехалі два львы.
5 сакавіка
Адэскіх львоў не пускаюць у Польшчу праз тое, што на дакументах няма подпіса галоўнага ветэрынара Украіны.
Ветэрынар з памежнага пункта пропуску Карчоўка Веслаў Тамашэўскі ў афіцыйным мэйле паведаміў: «Усе ўкраінскія органы кіравання дзейнічаюць, там можна атрымаць дакументацыю, якой не хапае».
Тым часам будынак у Кіеве, дзе працаваў галоўны ветэрынарны лекар Украіны, быў ужо разбураны. На той момант у Польшчу пускалі без поўнага камплекта дакументаў сабак, катоў і хамячкоў, аднак спецыяльных распараджэнняў аб экзатычных жывёлах не было.
Да справы падключыліся журналісты. Веслава Тамашэўскага запыталі, як жа тады папярэдняя партыя львоў трапіла ў Польшчу. Той адказаў «Штурмам», аднак інфармацыя не пацвердзілася. Аказалася, што для жывёл яшчэ паспелі зрабіць усе патрэбныя дакументы.
Ільвы чакалі на мяжы шмат гадзін і маглі б памерці. Позна ўвечары нарэшце пачалося афармленне ветэрынарных дакументаў.
6 сакавіка львоў прывезлі ў Познань.
7 сакавіка заапарк паведаміў, што жывёлам знайшлі новы дом і заўтра яны пераязджаюць. Другая навіна – пра зварот да міністра сельскай гаспадаркі і галоўнага ветэрынара Польшчы. Іх просяць спрасціць працэдуру эвакуацыі звяроў, на якіх распаўсюджваецца дзеянне Вашынгтонскай канвенцыі.
Супрацоўнікі познаньскага заапарка паведамілі: «Ужо чакаюць нашай дапамогі рысі і дзікія каты, якія ўдзельнічаюць у міжнародным праекце аховы відаў, зноў з ваколіцаў Кіева. Мы гатовыя!»
Вашынгтонская канвенцыя аб міжнародным гандлі відамі дзікай фаўны і флоры, якія знаходзяцца пад пагрозай знікнення, прынятая ў 1973 г. Каб перавезці праз мяжу звяроў, якія трапляюць пад дзеянне гэтай Канвенцыі, трэба больш дакументаў у параўнанні з відамі, якім знікненне не пагражае.
8 сакавіка ўратаваныя львы выехалі з познаньскага заапарка ў Іспанію і Бельгію. Супрацоўнікі заапарка напісалі на старонцы ў Facebook: «Сёння львы рушылі ў далёкую дарогу, але ўжо без гуку бомб і абстрэлаў… Да спакою, сытасці, вялікай прасторы. Нашы жывёлы-бежанцы з Украіны».
9 сакавіка ўдзень два ўкраінскія львы, Цар і Джаміль, былі ўжо ў Бельгіі. Позна ўвечары чатыры львы і лікаон даехалі да прытулку ў Іспаніі.