У мікрараёне «Усход» планавалі ўзвесці 37 адзінаццаціпавярховых шматкватэрных дамоў. Пад забудову траплялі зялёныя зоны і пляцоўкі для выгулу сабак. Адлегласць паміж будынкамі магла скараціцца да менш як 30 метраў.
Будаўніцтва меркавалася ў межах вуліц Савецкай Канстытуцыі, Крывашэіна, Маладагвардзейскай, Партызанскага праспекта, Арлоўскай, Гаўрылава і Гродзенскай.?
Грамадскі актывіст Ігар Маслоўскі, які займаецца гарадскімі праблемамі Берасця, назваў праект горадабудаўнічай памылкай. Паводле яго, гаворка ішла пра занадта шчыльную забудову без базавай экалагічнай інфраструктуры.
«37 панэльных 11-павярховых дамоў – і ніводнай нават невялікай зялёнай зоны. Гэта стварае эфект “цеплавога вострава”: бетон і асфальт назапашваюць цяпло, і тэмпература ў такіх кварталах можа быць на 3–5 градусаў вышэйшая. Узнікаюць праблемы з асвятленнем – дамы будуць закрываць сонца. Дадаецца транспартная нагрузка: больш машын – больш выкідаў, якія застаюцца ў дварах і кватэрах», – кажа ён.
Акрамя таго, праект прадугледжваў скарачэнне зялёных тэрыторый, месцаў для выгулу сабак і пагаршэнне якасці гарадской прасторы.
У берасцейцаў было два тыдні
На працягу гэтага часу жыхары масава накіроўвалі свае заўвагі і прапановы. У выніку, як адзначаецца ў афіцыйным адказе, гарадскія ўлады ўлічылі канструктыўныя заўвагі грамадзян і вырашылі накіраваць канцэпцыю на сур’ёзную дапрацоўку.
Быў прапанаваны кампрамісны варыянт: значна меншая колькасць дамоў пры абавязковым захаванні і стварэнні зялёных зон.
Улады заяўляюць, што ў новым праекце скароціцца колькасць дамоў, пашырацца зялёныя зоны і скверы, палепшыцца добраўпарадкаванне двароў, з’явяцца паркоўкі, будуць створаны пляцоўкі для выгулу хатніх жывёл.