Па словах Ганны Шастак, ідэйнай натхняльніцы праекта, задума са стварэннем цішотак была ад самага пачатку. Аднак яе рэалізацыя адкладалася праз “немагчымасць усё паспець аднымі рукамі”.
“Паспрыяў паскарэнню працэса выпадак. Неяк я падзялілася са сваімі знаёмымі ідэяй, а яны падказалі мне, што ёсць чалавек, які мае намер надрукаваць цішоткі ў падтрымку прытулка. Дарэчы, ідэю ён падгледзіў у таго ж маскоўскага праекта, што і я, – смяецца Ганна. – Мяне скантачылі з Кірылам і ён упісаўся ў арганізацыйныя моманты”.
Для самаго Кірыла такога кшталту ініцыятыва падалася абсалютна натуральнай рэччу. Па словах хлопца, многія яго знаёмыя займаюцца практычна такімі справамі: ездзяць у дзіцячыя дамы, дапамагаюць прытулкам для жывёл.
“Мае сябры, Саша і Вова, напэўна, кожны месяц ратуюць ката з вуліцы і знаходзяць для яго сям’ю. Таму цяжка заставацца безудзельным. Магчыма гэта закладзена на ўзроўні генаў, бо мае бацькі кормяць беспрытульных сабак ля нашага лецішча. Пакуль я жыў у Мінску дастаткова часта ездзіў на Гурскага, браў сабак на пераўтрыманне. Дома ў бацькоў да гэтага часу жыве гадаванец, якога я знайшоў яшчэ сляпым шчанюком. Зараз жывучы ў іншай краіне, мне вельмі хочацца падтрымліваць людзей, якія ўтрымліваюць прытулкі”, – распавядае Кірыл.
Прынт для цішоткі стараліся выбраць тэматычным, але і ў той жа час нейтральным, каб людзі хацелі набыць сабе абноўку не таму, што гэта ў падтрымку сабак, а па прычыне яе мімішнасці і крутасці. Выбар быў зроблены на карысць папулярнага персанажа – мопса Puglie, аўтарства канадскага мастака Euge Leung.
“Euge пачаў маляваць мопсіка ў 2014 годзе, практычна адразу гэты герой палюбіўся ўсім. І наша цішотка атрымалася без падтэкстаў, нейкіх прыхаваных сэнсаў… Проста мопсік і пончык. Як у такога салодкага персанажа не ўлюбіцца?”, – кажа Ганна
Набыць цішотку пакуль можна праз сацыяльныя сеткі праекта: Facebook, Вконтакте, Instagram. Усе грошы з продажу ідуць на падтрымку прытулка “Дом сабачай надзеі”.
“Мы разумеем, што падтрымка прытулка не вырашае праблемы беспрытульных жывёл. Але, нам падаецца, гэта адзін з першых крокаў да рашэння. Адна з галоўных мэт – прыцягнуць увагу да пытання, таксама вельмі хочацца радаваць людзей цудоўнымі рэчамі. Таму мы адкрыты да супрацы і шукаем новыя дызайны і ідэі для цішотак. Калі ў кагосьці ёсць, што прапанаваць нам, будзем рады!”, – падкрэслівае Кірыл.