Сотні беларусаў сабраліся на мітынг на Лукішскай Плошчы. Падтрымаць «Чарнобыльскі шлях» прыйшлі і афіцыйныя асобы Літвы, а таксама прадстаўнікі ўкраінскай дыяспары.
Людзі разгарнулі вялізныя сцягі Беларусі, Літвы і Украіны, а таксама разнастайныя плакаты з галоўным пасылам: «НЕ ядзернай зброі на тэрыторыі Беларусі».
Удзельнікі акцыі хвілінай маўчання ўшанавалі тых, хто загінуў падчас Чарнобыльскай аварыі, а таксама падчас ліквідацыі яе наступстваў.
Падчас мітынгу выступілі Святлана Ціханоўская, прадстаўнікі беларускіх палітычных рухаў і грамадскіх арганізацый, літоўскія палітыкі і грамадскія дзеячы, прадстаўнікі ўкраінскай дыяспары.
Пасля мітынгу на Лукішскай плошчы ўдзельнікі прайшлі маршам да расійскай амбасады, дзе была прынятая рэзалюцыя «Чарнобыльскага шляху». Яе асноўны пасыл – каб міжнародная грамадскасць адпаведна жорстка адказвала на ядзерныя пагрозы і выклікі калектыўнай бяспецы, у тым ліку па размяшчэнні Расіяй ядзернай зброі на тэрыторыі Беларусі.
Таксама аўтары рэзалюцыі заклікалі прыпыніць фінансаваць і тэхналагічна падтрымліваць ядзерную экспансію Расеі, уключаючы забарону на пастаўкі тэхналогій, што прымяняюцца ў атамнай прамысловасці і для вытворчасці ядзернай зброі, а таксама адмовіцца ад закупак расійскіх атамных тэхналогій і матэрыялаў. А на змену гэтым тэхналогіям павінны паўсюдна прыйсці экалагічна бяспечныя аднаўляльныя крыніцы энергіі.
«Менавіта пра будучыню, пра адказнасць перад наступнымі пакаленнямі павінны думаць усе, хто мае дачыненне да рашэнняў па атамнай энергіі – як мірнай, так і ваеннай, – падкрэсліла сябра праўлення ліквідаванага ўладамі «Экадома», актывістка Беларускай антыядзернай кампаніі Ірына Сухій. – Мы, найстарэйшая экалагічная арганізацыя Беларусі “Экадом”, добра ведаем, што радыеактыўны след аварыі на АЭС і ядзерных выбухаў цягнецца на сотні і тысячы гадоў у будучым. І нават калі атамная станцыя прапрацавала без аварый увесь тэрмін, яна становіцца вялікім клопатам на сотні гадоў і асабліва непад’ёмнай ношай для нашай краіны, якая развіваецца.
Акрамя таго, у руках дыктатараў атамная станцыя можа стаць патэнцыяльнай ядзернай зброяй, а планы па размяшчэнні ў Беларусі расійскай тактычнай ядзернай зброі – верх безадказнасці.
Гэта рашэнне не прынясе беларусам нічога, апроч новай небяспекі і яшчэ большай залежнасці ад Расіі. Таму ў гадавіну Чарнобыльскай катастрофы мы, прадстаўніцы і прадстаўнікі грамадскай супольнасці Беларусі, Літвы, Украіны, цвёрда кажам: не ядзерным пагрозам, не АЭС, не ядзернай зброі!»
