Зялёны партал прапануе тры няхітрыя стравы.
Бульбяныя клёцкі з грыбамі
Практычна ў кожным беларускім мястэчку знойдзецца свой рэцэпт бульбяных клёцак. Найчасцей іх рабілі з мясам і толькі ў час пасту — з капустай ці іншай гароднінай, а таксама грыбамі. Гэта якраз наш варыянт. За аснову мы бярэм страву пастаўскага раёна — клуцкі з "душамі", але начынку з фарша замяняем на грыбную.
Нам спатрэбяцца:
- 2 кг небуйной бульбы;
- 1 сярэдняя морква;
- буйная цыбуліна;
- 5-6 зубчыкаў часнаку;
- 500 г грыбоў (лепей лясных, але можна і шампіньёнаў);
- алей;
- соль, перац па смаку.
Бульбу мыем, чысцім і націраем на тарцы — выбіраем тарку для бульбянога цеста на дранікі.
Мыем і чысцім моркву, цыбулю і часнок. Моркву націраем на буйной тарцы. Цыбулю і часной дробна рэжам нажом.
Абмываем грыбы, пры неабходнасці чысцім іх і рэжам на кубікі.
Разаграем патэльню і дадаем крыху алею. Закідваем цыбулю і часной, добра абсмаўваем, затым дадаем моркву і грыбы, соль і перац па смаку — дасмажваем да гатоўнасці. УВАГА: смажанка не павінна быць надта тлуснай, таму ад пачатку алею дадаем не шмат.
Бярэм бульбяное цеста і невялікімі порцыямі добра адціскаем яго праз марлю. Праца гэта непростая і патрабуе сіл і часу. У выніку павінна атрымацца практычна сухая бульбяная цеставая маса. УВАГА: бульбяны сок адціскайце ў якую-небудзь ёмкасць. Дайце яму адстаяцца і акуратна зліце "ваду", пакідаючы утвораны крахмал на дне ёмкасці. Яго трэба дадаць у бульбяное цеста для лепшага мацавання. Дадаем соль па смаку, добра перамешваем.
Затым бярэм цеста і сталовай лыжкай аддзяляем порцыі. Раскатваем іх у нятонкія блінчыкі. Чайнай лыжкай укладаем падсмажаную начынку ў сярэдзіну блінца. Акуратна закрываем яго, змацоўваючы канцы і "валяем" ладонямі шарык — клёцку. УВАГА: клёцка павінна быць аднароднай знешне, без трэшчын і выямак.
Ставім вялікую каструлю з вадой, падсольваем яе. Як толькі вада закіпела, па кругу пачынаем укладаць гатовыя клёцкі. Іх не павінна быць зашмат у каструлі, каб не зліпаліся. Варыць на сярэднім агні неабходна хвілін 30-40.
Падаваць лепей ў глыбокіх місках і разам з невялікай колькасцю навара (вадой, у якой клёцкі варыліся). Для веганаў/ак страву можна прыправіць парэзанай свежай зелянінай: пятрушкай, пяром цыбулі, ці веганскім сметанковым соўсам з соі. Вегетарыянцы/кі могуць заправіць клёцкі смятайна. Да стравы можна падаваць кіслую капусту і засоленыя агуркі, рэшткі начынкі, калі яна ўся не разышлася.
Марынаваная (вострая) капуста
Нам спатрэбяцца:
- качан капусты ў 3 кг;
- 3 сярэднія морквіны;
- галоўка часнаку (ці колькасць на смак);
- чырвоны балгарскі перац па жаданні;
- на 1 літар кіпеню: 4 ст.л. цукру, 0,5 шклянкі алею, 3 ст.л. солі, 0,5 шклянкі яблычнага воцату.
Капусту дробна рэжам (можна на камбайне). Моркву мыем, чысцім і націраем на буйной тарцы. Чысцім зубчыкі часнаку і дробна рэжам.
Капусту, моркву і парэзаны часнок, па жаданні балгарскі перац, добра перамешваем і выкладаем у ёмкасць, можна слоік.
Даводзім да кіпення літар вады, дадаем 4 сталовыя лыжкі (можна менш) цукру і 3 сталовыя лыжкі (можна не поўныя) солі. Добра размешваем і дам астыць да пакаёвай тэмпературы. Пасля ўліваем паўшклянкі алею і столькі ж воцату. Марынад гатовы. Акуратна ўліваем яго ў ёмкасць з капустай, морквай і часнаком. Закрываем ёмкасць крышкай і даем настаяцца.
Страва будзе гатова для спажывання ўжо праз 4 гадзіны. Захоўваць марынаваную капусту лепей у халодным месцы — на лоджыі (пры тэмпературы не вышэй нуля) ці ў халадзільніку.
УВАГА: калі капуста маладая і сакавітая, то марынаду (адпаведна і інгрыдыентаў да яго) трэба меней.
Пры падачы алей у капусту дадаваць не трэба.
Марская капуста "пад шубай"
Традыцыйнай салатай да Новага году з'яўляецца не толькі аліўе, але і сялёдка "пад шубай". У савецкія часы, калі на добрую рыбу быў дэфіцыт, замяняльнікам для салаты служыла нават салёная кілька. Колькі сіл і часу ішло на прыгатаванне ў такім варыянце — цяжка ўявіць.
Для веганаў/ак і вегетарыянцаў/ак існуе свая варыяцыя салаты.
Нам спатрэбяцца:
- 3-4 сярэднія бульбіны;
- 2 невялікія морквіны;
- 2-3 сярэдніх бурачка;
- марская капуста без воцату;
- постны маянэз.
Бульбу, моркву маем і варым не чысцячы. Мыем і адварваем асобна бурачкі. Пры гатоўнасці зліваем з гародніны ваду і даем астыць.
Бярэм марскую кампусту. Лепей выбіраць салёную, але не марынаваную ў воцаце, каб яна не была занадта вострай. Як мага драбней рэжам яе.
Чысцім бульбу, націраем на буйной тарцы. Тое ж робім з морквай і буракамі.
Бярэм талерку ці салатнік, найлепей з плоскім дном і завышанымі краямі. У крайнім выпадку падыдзе і шкляная форма для запякання.
Пачынаем выкладаць салату слаямі: самы ніжні слой з бульбы, на яго выкладаем марскую капусту, затым пацёртую моркву і закрываем слоем буракоў. Паліваем звершу постным маянэзам. УВАГА: кожны слой прамазваецца тонкім слоям маянэзу, каб салата не была вельмі сухой. Як варыянт бульбу, моркву і баракі можна па-асобку перамяшаць з маянэзам і выкладаць слаямі ў гатовым выглядзе. Па жаданні і смаку перад марской капустай можна пракласці слой ў тонкапарэзанай цыбулі, але гэта не абавязкова.
Салату на пару гадзін найлепей паставіць у халадзільнік ці прахалоднае месца. Перад падачай можна пасыпаць зверху свежай парэзанай зелянінай.
Смачна есці! І вясёлых святаў!
ЧЫТАЙЦЕ ТАКСАМА: